Gobiernu del Principau d'Asturies

Asturies, muncho más cerca

Tas en

Asturias.es Temes Ganadería El Principáu promueve un proyectu pilotu de monitorización de la ...
 

Ganadería

El Principáu promueve un proyectu pilotu de monitorización de la ganadería estensiva nel Parque Nacional de los Picos d'Europa

La iniciativa Reciella en rede va desenvolvese en collaboración coles denominaciones d’orixe protexíes Cabrales y Gamonéu. El programa va permitir conocer meyor la dinámica de los rebañaos de ganáu menor y la so coexistencia con grandes carnívoros

18/05/2020

El director xeneral del Mediu Natural, David Villar, robló güei el protocolu Reciella en rede coles denominaciones d'orixe protexíes (DOP) Cabrales y de Gamonéu. Trátase d'un proyectu pilotu pa monitorizar de la ganadería estensiva nel Parque Nacional de los Picos d'Europa.

Esti proyectu va usar les nueves tecnoloxíes pa realizar el siguimientu d'animales escoyíos, a los que se van asitiar collares d'actividá con xeolocalización. D'esta miente, podrá conocese meyor la dinámica y forma de campéu del ganáu n'estensivu, en distintes zones y con distintos manexos. La iniciativa tamién va permitir pescanciar información de valor sobre la interacción de la ganadería estensiva con grandes carnívoros.

Les acciones van executase esti añu y los datos llograos van analizase'l próximu, coles mires d'anovar na adopción de práctiques de manexu y l'usu de nueves tecnoloxíes que permitan ameyorar la coexistencia ente depredadores y la ganadería estensiva a nivel autonómicu.

La iniciativa va desenvolver na vertiente asturiana del parque nacional, onde la práctica del pastoréu estensivu con ganáu menor ta bien enraigonada pa la ellaboración de quesos. Esti proyectu va ser un puntu de partida pa fomentar la collaboración ente estos axentes y l'Alministración rexonal, fortaleciendo los venceyos al traviés de la investigación y l’anovación.

Información sobre el documento

© Copyright 2006. Gobiernu del Principau d'Asturies