Gobiernu del Principau d'Asturies

Asturies, muncho más cerca

Tas en

Asturias.es Temes Vivienda VIPASA entra nel comité executivu de Housing Europe, federación ...
 

Vivienda

VIPASA entra nel comité executivu de Housing Europe, federación que representa los intereses de 26 millones de viviendes sociales

María Montes, xerente de la empresa pública del Principáu, va ocupar una de les nueve places de la dirección

06/09/2020

L’asamblea xeneral de la federación Housing Europe nomó miembru del comité executivu a María Montes, xerente de VIPASA y vicepresidenta actual de l’Asociación Española de Xestores Públicos de Vivienda y Suelu (AVS). La designación fíxose esta selmana nel procesu de renovación de trés de los nueve miembros qu’integren el máximu órganu de gobiernu de la entidá.

El comité dirixe la organización, integrada por 45 miembros que representen a 43.000 provisores públicos y privaos de vivienda social asequible de 24 países. Tien una influencia determinante pal accesu de la vivienda social porque xestiona los intereses de 26 millones de viviendes d’esta clas, el 11 % del total européu. Housing Europe destaca tamién pol so llabor divulgativu y investigador y por ser el lobby y interlocutor principal en materia de vivienda énte la Comisión y Parllamentu Européu.

Nel so discursu énte l’asamblea, la xerente de Vipasa destacó que’l so oxetivu ye “ayudar de forma activa a la defensa del sector de vivienda social y asequible n’Europa, porque nun va haber una recuperación durable a esta crisis sanitaria, social y económica si nun va acompañada de más y meyor vivienda pública y social”. Tamién sorrayó la importancia del “valor” de los servicios que desenvuelven los xestores públicos del sector, “que va muncho más allá d’apurrir unes llaves a los axudicatarios”.

L’asamblea xeneral cuntó cola participación de la directora xeneral de Mercáu Interior, Industria, Emprendimientu y Pymes de la Comisión Europea, Kerstin Jorna, qu’amosó’l so compromisu en favor d’esta clas d’inmuebles. Jorna destacó la importancia que va tener la inversión en rehabilitación y renovación enerxética d’edificios residenciales nel marcu del Fondu Européu pa la Recuperación. Insistió amás en que la inversión en vivienda social ye esencial pa garantizar el bienestar y la salú integral de les persones con menores ingresos.

El comité executivu de Housing Europe queda formáu agora por nueve miembros representantes d’asociaciones de provisores y xestores de vivienda social d’Italia, Finlandia, Alemaña, Holanda, Suecia, Francia, Estonia, Bélxica y España. Dende l’añu 2013, l’Asociación de Xestores Públicos VS nun tenía representación nesti Comité.

Información sobre el documento

© Copyright 2006. Gobiernu del Principau d'Asturies