Gobiernu del Principau d'Asturies

Asturies, muncho más cerca

Tas en

Asturias.es Temes Tresportes y Movilidá Aviones El Gobiernu d’Asturies llega a un alcuerdu col Grupu Iberia ...
 

Aviones

El Gobiernu d’Asturies llega a un alcuerdu col Grupu Iberia p’aumentar les conexones aérees con Madrid y Londres

La Conseyería d’Industria pacta cola empresa un aumentu de places na ruta a la capital, con un vuelu nuevu de cuatro frecuencies selmanales y tarifes dende 28 euros por trayectu, operáu por Iberia Express. El Principáu va tener un enllace con Heathrow, tres díes a la selmana, a partir del 24 d’abril

11/02/2016

El Principáu d’Asturies va cuntar con una conexón d’Iberia Express al aeropuertu londinense de Heathrow y vuelos nuevos de tarifa reducida na ruta a Madrid. Estes son dalgunes de les meyores que’l Gobiernu d’Asturies alcordó col Grupu Iberia y qu’esta mañana anunció’l conseyeru d’Empléu, Industria y Turismu, Francisco Blanco. Na presentación tamién participaron el director comercial d’Iberia, Marco Sansavini; la directora comercial d’Iberia Express, Silvia Mosquera; y el director xeneral de Comerciu y Turismu del Principáu, Julio González Zapico.

Francisco Blanco esplicó que’l so departamentu y l’aerollinia española acaben de zarrar un alcuerdu que va dexar introducir meyores nel contratu de promoción turística que la compañía desenvuelve xunto a les demás empreses de la UTE axudicataria nel 2014 del concursu públicu convocáu pol Principáu.

Na ruta a Madrid, Iberia Express va operar un vuelu nuevu con cuatro frecuencies selmanales. Esta conexón va ponese en marcha’l 24 d’abril y va ufiertar tarifes dende 28 euros por trayectu, mercando dir y volver, hasta 99 euros. Los vuelos van salir d’Asturies a les 11 hores los llunes y miércoles. Los vienres van operar dos frecuencies, a les 11 y les 15.45 hores. Dende la capital, les salíes van producise, a les 14.00 hores, los martes, xueves, vienres y domingos.

Los billetes van poder combinase colos demás vuelos d’Iberia ente Asturies y Madrid y van ampliase, polo tanto, les oportunidaes de conectar con más de cien destinos al traviés del centru d’operaciones de la compañía na T4 de Barajas.

Amás, el Principáu va cuntar con una conexón nueva con Londres a partir del 24 d’abril. Iberia Express va enllazar Asturies col aeropuertu de Heathrow los martes, xueves y domingos. Los vuelos van salir d’Anzu a les 18.20 y del aeropuertu londinense a les 20.30 hores. Hai que destacar que la ruta con Heathrow va dexar conectar Asturies cola rede internacional de British Airways al traviés del centru de distribución (hub) británicu. Los billetes d’esta ruta nueva yá tán a la venta a partir de 49 euros por trayectu, mercando dir y volver.

Estos vuelos nuevos d’Iberia Express súmense a les conexones que la compañía ufierta yá a Tenerife y a los que va poner en marcha esti branu a Gran Canaria.

Les novedaes anunciaes esta mañana xúntense a les iniciatives que se punxeron en marcha desque se firmó’l contratu de promoción turística que la compañía aérea desenvuelve xunto a les demás empreses de la UTE. Ente estos servicios destaquen la meyora d’horarios na ruta a Madrid, la tarifa pa empresarios y la tarifa pal segmentu vacacional.

Blanco destacó que l’alcuerdu nuevu al que se llegó con Iberia reflexa la voluntá, tanto del Gobiernu como de la empresa, de siguir trabayando de forma conxunta pa siguir favoreciendo la conectividá y les tarifes aérees del aeropuertu asturianu.

El conseyeru tamién valoró los beneficios d’esti alcuerdu nuevu pa los asturianos, porque se van aumentar les conexones aérees con Madrid y Londres, amás de les posibilidaes d’enllace con tola rede d’Iberia.

Nesti sentíu, sorrayó que Madrid ye ún de los principales mercaos turísticos nacionales p’Asturies, mentes que’l Reinu Uníu ye ún de los prioritarios nel ámbitu internacional, polo que la introducción de tarifes más económiques y la meyora de les conexones siempre suponen un aliciente y un impulsu importante pa la llegada de visitantes.

Información sobre el documento

© Copyright 2006. Gobiernu del Principau d'Asturies