Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies impulsa una campaña de promoción ...
 

Aniciu

El Gobiernu d’Asturies impulsa una campaña de promoción turística que busca aprovechar el clima como ventaya competitiva

La iniciativa incluye’l patrociniu d’espacios meteorolóxicos en televisión y internet. El conseyeru Isaac Pola presentó esta llinia nueva na entrega de les banderes azules a 12 playes, 5 centros de visitantes, 3 senderos y el puertu deportivu de Xixón

De izquierda a derecha: El presidente de la Asociación de Educación Ambiental y del Consumidor ADEAC, José Ramón Sánchez; la alcaldesa de Muros de Nalón, Carmen Arango; y el consejero de Empleo, Industria y Turismo, Isaac Pola

17/06/2019

El conseyeru d’Empléu, Industria y Turismu, Isaac Pola, anunció güei la puesta en marcha d’una campaña nueva de promoción turística que busca aprovechar el clima del Principáu como reclamu y ventaya competitiva. “La costa asturiana ye un paraísu dientro del paraísu pa poder safase de la calor afogadizo que sufre cada branu gran parte del territoriu español, y disfrutar tol añu de les ventayes d’un clima suave, na meyor contorna imaxinable”, señaló.

Pola realizó estes declaraciones en Muros, na entrega de les banderes azules 2019, qu’anueven la certificación de 12 playes, 5 centros de visitantes y el puertu deportivu de Xixón. Como novedá, d’esta vuelta estrena reconocencia la Sienda de los Miradores, que comparte bandera cola sienda peatonal de la costa d’Artéu y El Cabo Peñes.

La campaña turística, que caltien el lema Vuelvi al Paraísu, yá ta en marcha y va difundise en televisión, radio, cine, soportes de publicidá esterior, medios dixitales y redes sociales hasta la primer quincena de xunetu, cola mira d’aprovechar les primeres foles de calor de la península. “Vamos recordar a los nuestros públicos d’interés que n’Asturies pue escapase del ruíu, la calor y l’estrés de la rutina diaria pa volver alendar, volver comer bien, y volver refrescase”, sorrayó’l conseyeru.

Como novedá principal, inclúyese’l patrociniu de dalgunos de los espacios meteorolóxicos de mayor audiencia en televisión, lo mesmo que de la páxina www.eltiempo.es y la so aplicación. Otru formatu novedosu va ser la proyección d’imáxenes refrescantes del Principáu dientro de los trenes del metro de Madrid, con sistema novedosu que dexa visualizar vídeos nes ventanes del vagón de la que percuerre’l túnel.

L’oxetivu d’esta iniciativa ye, según Pola, da-y un impulsu “a una temporada que se presenta coles meyores perspectives”. El turismu siguió medrando n’Asturies nel 2019, con un aumentu del 2,8 % en pernoctaciones nel primer cuatrimestre. “Aspiramos a afitar esti branu’l bon enclín de la Selmana Santa, gracies al trabayu del empresariáu, el sector y la propia alministración”, amestó.



Banderes Azules

El conseyeru aprovechó la entrega de les banderes azules pa poner en valor la calidá medioambiental de la costa asturiana, la meyor caltenida d’España. “En cuenta de ser un tópicu, ye’l resultáu d’años de trabayu y d’enfotu por entender la naturaleza como un activu tanto económicu como simbólicu”, precisó.

Doce playes asturianes anueven anguaño la certificación que concede l’Asociación d’Educación Ambiental y del Consumidor: Arnao (Castropol), Penarronda (Castropol / Tapia de Casariego), Frexulfe (Navia), Outur y La Ribeirona (Valdés), La Concha Artéu y La Ribera (Cuideiru), Aguilar (Muros), El Puertu y Salinas (Castrillón), y La Ñora y Rodiles (Villaviciosa).

El Puertu Deportivu de Xixón tamién caltién la bandera, xunto a estos centros azules: Muséu d’Ancles Philippe Cousteau (Castrillón), Muséu de la Mina d’Arnáu (Castrillón), Buque Creoula de la Universidá Itinerante del Mar, Centru de Visitantes y Interpretación del Mediu Marín de Peñes (Gozón) y Muséu Marítimu d’Asturies (Gozón).

Amás, trés senderos súmense a la llista de recursos con bandera azul: la sienda peatonal de la Costa d’Artéu (Cuideiru), El Cabo Peñes (Gozón) y, pela primer vez, la sienda costera de Los Miradores (Muros).

La costa asturiana recibió la selmana pasada otra reconocencia: el Premiu Conde Nast Traveler a la costa occidental asturiana como meyor destín nacional. “Un premiu asina, avaláu por un grupu editorial con influencia internacional, namás nos fala de cómo la nuestra costa s’afitó como un pegollu fundamental del paraísu natural”, destacó Pola.

 

   Icono gráfico alusivo al tipo de archivo Audiu (Audiu: 46 Kb) (n'español)

Información sobre el documento

© Copyright 2006. Gobiernu del Principau d'Asturies