Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El Principáu somete a consulta pública la reforma del decretu ...
 

Actualidá

El Principáu somete a consulta pública la reforma del decretu del salariu social pa incentivar l’empléu y la formación de los sos beneficiarios

Les persones interesaes puen realizar les sos aportaciones na web www. asturiasparticipa. es hasta’l 21 de setiembre. La conseyera de Derechos Sociales calcula que n’avientu va tenese una estimación clara de cuántos usuarios van pasar a cobrar l’ingresu mínimu vital

13/09/2020

El Gobiernu d’Asturies sacó a consulta pública previa la modificación del decretu que regula’l salariu social básicu (SSB). Con esta modificación, la Conseyería de Derechos Sociales y Bienestar busca incentivar l’empléu y la formación de les sos beneficiaries, menguar les cargues burocrátiques y simplificar los procedimientos de concesión y revisión col usu de la declaración responsable.

El SSB, que s’implantó n’Asturies nel 2005, diríxese a persones que nun tengan recursos económicos abondos pa cubrir les sos necesidaes básiques. Na actualidá, el Principáu ta llevando a cabu’l procesu de tresvase d’espedientes dende esta ayuda al ingresu mínimu vital (IMV). Yá s’unviaron 8.900 d’un total de 14.700 al Institutu Nacional de la Seguridá Social.

La reforma trata tamién la rellación de dambes rentes. La conseyera de Derechos Sociales, Melania Álvarez, esplicó que “va haber persones que van siguir percibiendo’l salariu social y va ser n’avientu cuando vamos tener una estimación clara de cuántos usuarios van siguir percibiendo l’ayuda autonómica y cuántos l’ingresu mínimu vital”.

El decretu nuevu va garantizar de manera transitoria –hasta la modificación de la Llei 4/2005, de 28 d’ochobre, reguladora del salariu social-- la coesistencia de dambes prestaciones, de manera qu’esta confluencia tea acorde cola so finalidá y seya proporcionada, equitativa y ordenada. “Naide va dexar de recibir la prestación, l’ayuda ta garantizada anque esa persona pase agora a percibir l’ingresu mínimu vital. Tolos beneficiarios del salariu social puen tar tranquilos nesti sentíu”, aseguró la conseyera.

Tolos ciudadanos interesaos n’ayudar coles sos aportaciones al documentu puen facelo hasta’l 21 de setiembre al traviés de la web www.asturiasparticipa.es .


Icono gráfico alusivo al tipo de archivo Audiu (Audiu: 283 Kb) (n'español)

Información sobre el documento

© Copyright 2006. Gobiernu del Principau d'Asturies