Gobiernu del Principau d'Asturies

Asturies, muncho más cerca

Tas en

Asturias.es Persones entamadores Industria amplía'l plazu máximu para resolver espedientes de ...
 

Persones entamadores

Industria amplía'l plazu máximu para resolver espedientes de regulación temporal d'empléu por causes de fuerza mayor

El tiempu para analizar y comunicar los ERTE estiéndese a 10 díes énte'l volume de solicitúes derivaes de la crisis sanitaria. La midida afecta a los presentaos dende'l día 23 y nun modifica’l plazu de les empreses pa solicitar al SEPE les prestaciones de los trabayadores nin retrasa la so percepción

30/03/2020

La Conseyería d'Industria, Empléu y Promoción Económica aprobó una resolución pola que s'amplía a 10 díes -frente a los 5 actuales- el plazu máximu pa la resolución y notificación de los espedientes de regulación temporal d'empléu (ERTE) por causes de fuerza mayor derivaos de la crisis sanitaria.

La resolución, roblada pol conseyeru Enrique Fernández y publicada güei nel Boletín Oficial del Principáu (Bopa) como una adenda, xustifícase pol eleváu númberu de solicitúes recibíes pola Dirección Xeneral d'Empléu y Formación que, na práctica, enzanca'l cumplimientu de los plazos primeramente fixaos. Esti cambéu, sicasí, afecta solo a los espedientes presentaos dende'l día 23 de marzu.

Son munchos los equipamientos, locales, establecimientos y actividaes que quedó suspendida la so apertura al públicu según lo dispuesto nel Real Decreto 463/2020, de 14 de marzu, pol que se declara l'estáu d'alarma, mesmo qu’en diverses resoluciones de la Conseyería de Salú poles que s'adopten midíes de salú pública. Esta suspensión tan estensa y xeneralizada, qu'afecta a gran parte del texíu económico del Principáu, motivó la presentación d'un eleváu númberu de solicitúes de suspensión de contratos y amenorgamientu de xornada por causa de fuerza mayor.

Poro, el volume de les solicitúes presentaes y, especialmente, d'aquelles que pudieren presentase nel futuru, fai imposible la resolución de los procedimientos nel plazu de 5 díes señaláu nel artículu 22 del Real Decreto-Llei 8/2020, de 17 de marzu.

Magar la Conseyería d'Industria, Empléu y Promoción Económica utilizó tolos medios personales y materiales de los que dispón pa la tramitación de los espedientes, adscribiendo más personal pa que desenvuelva funciones alministratives y de tramitación en sofitu de la Dirección Xeneral d'Empléu y Formación, tanto de forma presencial como por aciu teletrabayu, el volume de solicitúes, que s'incrementa cada día, fai prever que va resultar mui difícil cumplir col plazu establecíu y colos mínimos requisitos de seguridá xurídica que la resolución d'estes solicitúes esixe.

Anque los procedimientos de regulación tengan calter temporal, traen un impactu negativu de calter estructural sobre l'empléu y la economía, sobremanera pa plantiyes y empresariáu. Por esti motivu, l'Alministración hai de ser rigorosa na so aplicación y tien qu'esaminar y constatar, casu por casu, la fuerza mayor alegada por caúna de les compañíes.

Esta ampliación pa la resolución d'espedientes nun supón cambeos nos plazos prescritos a les empreses pa comunicar al Serviciu Públicu d'Empléu Estatal (Sepe) los datos de los trabayadores afectaos polos ERTE de cara a la tramitación de les prestaciones llaborales. Tampoco supón retrasu dalgunu na percepción de les mesmes, acordies colo establecío nel Real Decreto-llei 9/2020, de 27 de marzu.

Información sobre el documento

© Copyright 2006. Gobiernu del Principau d'Asturies