Gobiernu del Principau d'Asturies

Asturies, muncho más cerca

Tas en

Asturias.es Temes Cultura Archivos y Biblioteques Les biblioteques públiques asturianes rexistraron cerca de trés ...
 

Archivos y Biblioteques

Les biblioteques públiques asturianes rexistraron cerca de trés millones d’ usuarios y realizaron más d’ un millón d’ empréstamos en 2018

La rede duplicó l’añu pasáu la demanda de conteníos dixitales ya incrementó’l númberu d’asistentes a les actividaes culturales

22/04/2019

La rede de biblioteques públiques d'Asturies rexistró l'añu pasáu 2.954.659 usuarios y 1.061.553 empréstamos ente llibros, documentos sonoros, electrónicos, vídeos, etcétera. Amás, esperimentó una vultable xubida na solicitú de conteníos dixitales, que pasó de 8.728 a 15.674, y dio d'alta a 27.105 nuevos socios.

Tamién llogró un notable aumentu del númberu de siguidores nes redes sociales, que superen yá los 78.000, y multiplicó la cifra de consultes nes cuentes y les entraes a la revista dixital biblioasturias.

Per otra parte, los fondos de les biblioteques, con 70.451 incorporaciones en 2018, algamen los 2.928.119 elementos, de los que 2.517.129 son llibros.

Tocantes a la promoción cultural, entamáronse 5.348 actividaes, 88 más qu'en 2018, que cuntaron con 196.649 asistentes, cerca de 60.000 más.

La rede diseñó un estensu programa d'actividaes pa celebrar el Día del Llibru, que puede consultase na web de biblioasturias: http://www.biblioasturias.com/dia-del-libro-2019-en-las-bibliotecas-asturianas/

La gran mayoría de los actos tán destinaos a averar la llectura a los más nuevos. La programación, que s’allarga hasta finales de mes, inclúi cuentacuentos, esposiciones y teatru infantil, amás de rutes lliteraries con diverses temátiques n'Avilés, Uviéu y Castropol; llectures siguíes, como la de la obra d'Antonio Machado en Xixón, y presentaciones de llibros, visites escolares, concursos de marcapáxines o esposiciones en toa Asturies.

Na Biblioteca Pública Xovellanos de Xixón, Begoña Camblor, de la Universidá de La Rioxa, va abrir mañana cola ponencia Aurora de Albornoz, una poeta olvidada en el exilio , un ciclu de conferencies sobro dalgunos de los nomes más relevantes de la lliteratura asturiana nel exiliu del pasáu sieglu, como Alejandro Casona, Luis Amado -Blanco, Celso Amieva, Alfonso Camín, Antonio Ortega o Matías Conde.

El tradicional marcapáxines que la Conseyería d'Educación y Cultura edita con motivu del Día del Llibru rinde homenaxe a Antonio Machado nel ochenta aniversariu de la so muerte, cola cita: “Depués de la verdá nada hai tan guapo como la ficción”.

 

Información sobre el documento

© Copyright 2006. Gobiernu del Principau d'Asturies