Gobiernu del Principau d'Asturies

Asturies, muncho más cerca

Tas en

Asturias.es Temes Ganadería El Gobiernu d'Asturies impulsa los usos tradicionales agrícoles ...
 

Ganadería

El Gobiernu d'Asturies impulsa los usos tradicionales agrícoles y ganaderos nos parques naturales

Los instrumentos nuevos de xestión d'estos espacios, en procesu d'aprobación, busquen reconocer la so contribución al caltenimientu de la biodiversidá

09/12/2019

El Gobiernu d'Asturies va apostar por protexer y impulsar l'actividá vinculada a los usos tradicionales agrícoles y ganaderos nos parques naturales pola so contribución al caltenimientu de la biodiversidá. La midida ye una de les novedaes principales de los nuevos Instrumentos de xestión integrada (IGI), que fueron aprobaos apocayá poles comisiones rectores de los parques naturales de Ponga, Somiedu y Les Ubiñes-La Mesa.

Nos cambeos introducíos destaca como unu de los oxetivos prioritarios la protección d'espacios como los praos de siega y pacionales, característicos del cordal Cantábricu y que'l so manexu tradicional ye fundamental nel caltenimientu del paisaxe y de la numberosa flora y fauna qu'alluguen.

Otra de les novedaes ye'l mayor protagonismu que se da a los habitantes, tanto a la población residente como a los que desenvuelven dalguna actividá nestes redolaes, a los que s'implica más na xestión. Asina mesmo, ufiértase-yos mayor seguridá xurídica, yá que defínense meyor les actividaes y usos dexaos, autorizables y prohibíos, y esaníciase la suxetividá na aplicación de la norma.

A lo último, los instrumentos de xestión caltienen como oxetivu de conservación los hábitats naturales. Por ello, defínense una serie d'elementos clave a caltener y establezse un programa de monitorización, al traviés del cual va realizase un siguimientu activu y va midise la so evolución.

Los instrumentos nuevos de xestión integrada avancen na so tramitación, tres un procesu participativu ampliu, y tienen yá'l vistu bonu al so cambéu por parte de les comisiones rectores de cada parque. Agora han sometese a un procesu d'información pública y allegaciones, tres el que van ser aprobaos.

Información sobre el documento

© Copyright 2006. Gobiernu del Principau d'Asturies