Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Comerciu El Gobiernu d'Asturies pon en marcha una oficina d'atracción ...
 

Comerciu

El Gobiernu d'Asturies pon en marcha una oficina d'atracción d'inversiones pa impulsar la recuperación económica

Esti nuevu órganu cunta cola participación de les Cámares de Comerciu y el sofitu d’Asturex. L’Idepa va xestionar la iniciativa, que suma 11 técnicos y asesores especializaos en captación de proyectos empresariales. El conseyeru d'Industria xulga “estratéxica” la propuesta y destaca l'exemplu de collaboración ente'l sector públicu y la iniciativa privada pa promover la reactivación tres la crisis

24/06/2020

El Gobiernu d'Asturies punxo en marcha una oficina para l'atracción d'inversiones empresariales, coordinada pol Institutu de Desenvolvimientu Económicu del Principáu (Idepa), que naz coles mires de convertise n'una ferramienta de collaboración ente'l sector públicu y l'iniciativa privada pa la dinamización económica. Esti nuevu órganu va empezar a funcionar cola reconstrucción del texíu económicu de la comunidá tres la crisis sanitaria provocada pola COVID-19.

La oficina ye unu de los compromisos del programa de llexislatura de la Conseyería d'Industria y pa la so puesta en marcha cuntóse cola collaboración de les Cámares de Comerciu. Tamién va cuntar col sofitu de la rede de la Sociedá de Promoción Esterior del Principáu (Asturex), integrada por un centenar de técnicos y especialistes en mercaos internacionales.

El centru d'operaciones va tar nel Idepa, que va liderar la estratexa de captación d'inversiones. Pa ello, l'institutu destinó 7 técnicos con amplia esperiencia na xestión de proyectos d'inversión a los que se van xunir cuatro profesionales de les entidaes que formen el Grupu Idepa.

La presentación de la oficina celebróse esta mañana nun actu nel que participaron el conseyeru d'Industria, Empléu y Promoción Económica, Enrique Fernández; los directores xenerales d'Industria, Rosana Prada; de Minería y Reactivación, Belarmina Díaz, y del Idepa, Eva Pando; el director xeneral de Comerciu, Entamadores y Economía Social, Julio Zapico, y representantes de les Cámares de Comerciu, la Federación Asturiana d'Empresarios (Fade), Hunosa, Torsa Capital y l'asociación Asturies Power.

El titular d'Industria sorrayó que l'oxetivu d'esti órganu ye “atraer inversiones a la comunidá y nuevos proyectos empresariales qu'aprovechen tol potencial, les nuestres capacidaes científico-tecnolóxiques ya industriales, les nuestres infraestructures, la nuestra localización estratéxica y la nuestra escelente calidá de vida”.



Exes d'actuación

P'algamar esti oxetivu, Fernández marcó cuatro exes que van entamar el llabor de la oficina. De primeres, la promoción del Principáu como llugar aparente pa invertir. So la marca Invest in Asturies, yá desenvuelta pol Idepa, va ellaborase material promocional pa esibir les capacidaes humanes, científico-tecnolóxiques, culturales ya institucionales de la comunidá p'atraer nueves empreses. Coles mesmes, van realizase campañes y acciones apoyaes nes redes que los socios van apurrir al proyectu, mesmo que nes yá esistentes.

La segunda exa va consistir na aceleración de proyectos estratéxicos con alta xeneración d'empléu ya intensivos n'inversión, que puedan tar amestaos a la transición enerxética y ecolóxica”.

Otru pilar de la estratexa va ser Asturies Industrial, que surde de la collaboración del Principáu col Ministeriu d'Industria, Comerciu y Turismu pal desenvolvimientu d'iniciatives, aprovechando fondos nacionales y europeos pa la reindustrialización de la rexón.

La última exa va ser la de sofitu financieru, el denomináu Pool d'inversión, nel que s'atopen tolos preseos del Principáu pa sofitar inversiones granibles, mesmo que los fondos y les sociedaes d'inversión público-privaes: Sociedá Rexonal de Promoción (SRP), Sodeco, Sadim y Torsa Capital.

La gobernanza de la oficina va recayer en trés comités integraos poles entidaes responsables de caúna de les árees nes que se va desenvolver la estratexa de captación de proyectos: promoción, implantación ya inversión.

El conseyeru d'Industria considera que, con esta ferramienta, el Gobiernu d'Asturies “va dar un nuevu impulsu a la economía, basáu en nuevos capitales, nueves iniciatives y tamién nueves cultures que contribuyan a diversificar y modernizar la estructura granible”. Nesti sentíu, precisa que la oficina representa “el compromisu d'aunir, integrar y sumar recursos con un fin común: la reactivación económica del Principáu tres la crisis del COVID-19”.


Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies