Gobiernu del Principau d'Asturies

Asturies, muncho más cerca

Tas en

Asturias.es Temes Educación Les escueles públiques asturianes van empezar el cursu con más ...
 

Educación

Les escueles públiques asturianes van empezar el cursu con más especialistes en necesidaes educatives que l’añu pasáu

Actualmente, ta prevista la incorporación de 197 profesionales de Pedagoxía Terapéutica y 146 d’Audición y Llinguaxe, cantidá que podría aumentar cola tercer convocatoria d’interinos, que se va celebrar el día 22. La conseyería atendió tamién toles reivindicaciones d’aumentu de profesionales presentaes polos centros públicos d’educación especial. La segunda convocatoria d’interinos, realizada güei, va dexar cuntar con 1. 163 docentes nuevos, que se sumen a los 3. 091 de xunetu

11/09/2020

Les escueles públiques d’Asturies van empezar esti cursu con más profesionales en necesidaes educatives especiales que l’añu pasáu. Hasta’l momentu, la Conseyería d’Educación decidió incorporar 197 profesionales de Pedagoxía Terapéutica (PT) y 146 d’Audición y Llinguaxe (AL). Sicasí, esta cantidá nun ye definitiva: podría aumentar cola tercer convocatoria de profesoráu interino, prevista pal día 22.

El postrer cursu les clases empezaron con 148 especialistes en Pedagoxía Terapéutica y 108 n’Audición y Llinguaxe. Depués, a lo llargo de setiembre, les plantiyes van reforzase hasta sumar, respectivamente, 194 y 135 profesionales. En dambos casos, menos que les yá previstes: en concreto, trés menos en PT y once menos n’AL.

Les cifres actuales resulten de la suma de les dos convocatories d’interinos realizaes anguaño. La primera, el 31 de xunetu, y la segunda, güei mesmo. Como entá falta la tercera, les cantidaes definitives podríen ser más grandes. Con esta dotación de profesionales, la conseyería constata’l so compromisu col alumnáu con necesidaes especiales, coles sos families y, tamién, colos mesmos especialistes.

Esta distribución refierse a los centros educativos públicos. Amás, la conseyería atendió tamién toles reivindicaciones d’aumentu de profesionales presentaes polos centros públicos d’Educación Especial.

La convocatoria d’interinidá entamada güei pola Dirección Xeneral de Personal Docente, la segunda pa esti cursu, cunta con 1.163 places, la mayoría d’Infantil, Primaria y d’especialistes en necesidaes educatives. Estes 1.163 xúntense a les 3.091 que s’axudicaron en xunetu.

La conseyería sacó nesta segunda convocatoria les más de les places de los ciclos d’educación infantil y primaria pa facilitar la so incorporación a les aules nel principiu del cursu, previstu pal 22 d’esti mes. Na tercer selmana de setiembre va siguir el mesmu procedimientu con Secundaria, Bachilleratu y Formación Profesional (FP).

En total, l’esfuerzu económicu previstu pol Gobiernu d’Asturies p’atender les necesidaes educatives derivaes de la pandemia va superar los 40 millones. Esi desembolsu va facer posible la contratación estraordinaria de 865 docentes.

Información sobre el documento

© Copyright 2006. Gobiernu del Principau d'Asturies