Gobierno del Principado de Asturias

Asturias, mucho más cerca

Estás en

Aniciu Coxersa duplica la capacidá de la so planta de reciclaxe ...
 

Aniciu

Coxersa duplica la capacidá de la so planta de reciclaxe d’envases y va poder tratar 25.500 tonelaes al añu

Les obres p’ampliar y modernizar les instalaciones supunxeron una inversión superior a los 4,1 millones. El consorciu tamién aumentó’l depósitu de seguranza de residuos industriales y garantiza’l so funcionamientu hasta’l 2028. El conseyeru Benigno Fernández Fano visitó güei’l centru de xestión de Serín

d'esquierda a derecha: el xerente de Coxersa, Santiago Fernández; el conseyeru d'Infraestructures, Ordenación del Territoriu y Mediu Ambiente, Benigno Fernández Fano; el representante d'Ecoembes, Fernando Blázquez, y l'alcalde de Llanera, Gerardo Sanz

13/06/2019

El Consorciu pa la Xestión de Residuos Sólidos d’Asturies (Coxersa) remató les obres de modernización y ampliación de la planta de reciclaxe d’envases de Serín, que va poder tratar el doble de material depositao nos contenedores mariellos, hasta algamar les 25.500 tonelaes al añu.

Esta obra, que s’allargó 15 meses, supunxo una inversión de 4.195.931 euros y foi la primera de les aprobaes pol Gobiernu d’Asturies en marzu del 2018, que, con un presupuestu de más de cinco millones, tienen como oxetivu avanzar na xestión de los residuos.

L’aumentu de la capacidá de la planta d’envases, que tenía como tope la xestión de 12.000 tonelaes por añu -una cantidá abondo pal momentu actual anque medrando de contino-, garantiza’l tratamientu afayadizu nel futuru.

La primer fase de los trabayos valió pa aumentar la nave de clasificación d’envases, que’l so desenvolvimientu axudicóse a Iguastur S. L. Na segunda fase, la empresa escoyida, Constructora de Calaf S.A.O., anovóse la maquinaria de selección, que va procesar hasta siete tonelaes por hora. En concreto, adquiriéronse equipos más modernos, que perfeccionen l’automatización de la instalación y ameyoren les condiciones de seguranza de los trabayadores.

El conseyeru d’Infraestructures, Ordenación del Territoriu y Mediu Ambiente, Benigno Fernández Fano, que visitó güei la planta acompañáu pola directora xeneral de Calidá Ambiental, Paz Orviz, y el xerente de Coxersa, Santiago Fernández, destacó qu’esta obra supón un pasu más nel compromisu del Principáu cola xestión de los residuos y col cumplimientu de los oxetivos de reciclaxe qu’afita la normativa comunitaria. “El reciclaxe tien que ser y ye una xera que concierne a tola sociedá, a les alministraciones que ponen los medios técnicos necesarios y a los ciudadanos que, col xestín cotidianu de depositar los residuos nel contenedor afayadizu, realicen un actu fundamental pal mediu ambiente”, destacó.

Otra manera, Coxersa amplió tamién el depósitu de seguranza de residuos industriales, que garantiza la so capacidá hasta’l 2028. El proyectu consistió nel movimientu de tierres y l’aumentu de la impermeabilización doble con llámines de polietilenu d’alta densidá y magre que garantiza la protección del suelu y del agua soterraño. A esti depósitu lleguen residuos industriales sólidos con componentes peligrosos como ceniza, escoria, basa estabilizao o tierra contaminao, ente otro.

 

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobierno del Principado de Asturias