Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies invirtió más de 8,5 millones en cuatro ...
 

Aniciu

El Gobiernu d'Asturies invirtió más de 8,5 millones en cuatro años p’anovar los equipos radiolóxicos de la sanidá pública

Seis millones destináronse a la compra de resonancies magnétiques y mamógrafos de xeneración última. La Conseyería de Sanidá y l'Asociación de Radiólogos del Principáu alcuerden evitar trés tipos de pruebes innecesaries. Güei celébrase'l día mundial d'esta especialidá, centráu na importancia de los exámenes basaos n'imáxenes cardiaques

08/11/2018

El Gobiernu d'Asturies invirtió más de 8,5 millones nos cuatro años últimos n'anovar y dotar d’aparatos nuevos de diagnósticu per imaxe la sanidá pública, un gastu que se compatibilizó col equipamientu de los nuevos hospitales abiertos nel 2014 (L’HUCA y l'Álvarez Buylla) y con otres formes d'alquisición al marxe de la compra directa. La Conseyería de Sanidá divulgó güei estos datos por cuenta de la celebración del Día Mundial de la Radioloxía, centráu anguaño na importancia de les imáxenes cardiaques y el so valor frente a otres técniques más invasives.

La mayor parte de la inversión realizada, más de 6 millones, destínase a la compra de resonancies magnétiques y mamógrafos d'última xeneración, sobre manera pa la detección de cáncer de mama. El restu dexó financiar l'adquisición d’ecógrafos, una ferramienta de diagnósticu que'l so usu ta cada día más estendíu en múltiples patoloxíes.

L’equipamientu nuevu supón una meyora importante tanto na calidá de la imaxe diagnóstica como na seguridá de los pacientes. Los aparatos de rayos ufierten imáxenes cada vez más definíes, de la qu'amenorguen el tiempu d'esposición de los usuarios a la radiación. Tamién dexen captar imáxenes cardiaques de resolución alta, como'l TC coronariu y la resonancia magnética cardiaca.

El TC coronariu consiste nun estudiu anxiográficu de les arteries coronaries pa evaluales de forma non invasiva y úsase pa refugar patoloxíes de corazón en persones de riesgu baxu o moderáu, cola mira d'evitar un cateterismu. Esti tipu de pruebes en pacientes con enfermedá coronaria severa ye un factor de pronósticu independiente que facilita, con ayuda de los cardiólogos, predicir eventos y ayudar a orientar los tratamientos.

Otra manera, la resonancia magnética cardiaca ye un estudiu de la morfoloxía y la función del corazón y la viabilidá del texíu miocárdicu que dexa analizar tumores, miocardiopaties, valvulopatíes, isquemia, infartu de miocardiu, y malformaciones conxénites.

 

Meyora de la seguridá

El Día Mundial de la Radioloxía tamién se dedica a la seguridá. Nesti sentíu, la Conseyería de Sanidá y l'Asociación de Radiólogos del Principáu trabayen a comuña dende va dos años nos criterios apropiaos d'usu de los servicios de radioloxía nos centros del Serviciu de Salú (Sespa), lo que va contribuyir a ameyorar la práctica profesional y la calidá en toles iniciatives orientaes al paciente.

Ente los alcuerdos soscritos destaquen:

   - Nun realizar radiografíes simples de craniu de manera rutinaria en pacientes con traumatismu craneoencefálicu (TCE), sacante confirmación o sospecha de TCE de causa non accidental.

   - Nun practicar radiografíes simples d'abdome de forma rutinaria en neños y adolescentes con dolor abdominal agudu, sacantes sospecha d’obstrucción o perforación intestinal.

   - Nun facer radiografíes de pelvis en pacientes politraumatizaos si va practicase una tomografía computarizada de cuerpu completu.

L'adecuación d'estes pruebes contribuye a menguar la esposición de radiaciones ionizantes y al cumplimientu afayadizu de la normativa Euratom 59/2013. De la mesma, la restricción de pruebes radiolóxiques non indicaes ayuda a amenorgar les llistes d'espera y a evitar exámenes innecesarios o que puedan resultar perxudiciales pa los pacientes.

 

 

Información sobre el documento

© Copyright 2006. Gobiernu del Principau d'Asturies