Gobiernu del Principau d'Asturies

Asturies, muncho más cerca

Tas en

Asturias.es Temes Cultura La Sala Borrón acueye hasta'l 27 d'avientu la esposición El ...
 

Cultura

La Sala Borrón acueye hasta'l 27 d'avientu la esposición El tiempo de las Cosas de l'artista asturiana Tania Blanco

L'autora foi gallardonada col Premiu Asturies Xoven d'Artes Plástiques 2018. La muestra convida a reflexonar sobre la forma na que se percibe'l pasu del tiempu y los cambeos nes propiedaes de la materia

27/11/2019

La Sala Borrón d'Uviéu va acoyer hasta'l 27 d'avientu la esposición El tiempo de las cosas, de l'artista asturiana Tania Blanco, Premio Asturies Xoven d'Artes Plástiques 2018. La directora del Institutu Asturianu de la Mocedá, Clara Sierra va ser la encargada d'inaugurar la muestra mañana, a partir de les 19:30 hores.

Nesta selección, l'autora, que la so práctica artística céntrase na organización de xeometríes de lo cotidiano nes qu'identifica la potencialidá d'oxetos y situaciones doméstiques como xeneradores de formes nueves, arrexunta una serie d'elementos suxetos a fenómenos naturales (aire, vientu, agua de mar, tierra) mientres un periodu concretu de tiempu en dos puntos xeográficos distintos venceyaos a la so esperiencia personal: la bahía de Cádiz y la cornisa cantábrica. D'esta forma, Blanco trabaya col pasu del tiempu y cola incidencia de la redolada pa conformar una obra na que la duración se define como un procesu que namás puede ser percibíu al traviés de los cambeos nes superficies, nes coses, nos oxetos.

Tania Blanco ye llicenciada en Belles Artes pola Universidá de Salamanca y especializada en técniques gráfiques al traviés d'una estensa formación. La so obra foi espuesta en feries, festivales y esposiciones ente los que destaquen el festival Néxodos (San Román de Candamo, 2017); Time of Exposure, La Carcel_Segovia (Segovia, 2018); Aún Sueño, CMAE (Avilés, 2018); y Artistas y Derivados, Museo Barjola (Xixón, 2016). Ente les sos beques y reconocencies tán el Premiu Asturies Xoven d'Artes Plástiques 2018, la Beca de Producción de la Factoría Cultural 2019 y la Beca d'Emplea Cultura del Banco Santander 2019.

La obra tamién va poder vese na Casa Municipal de Cultura d'Avilés del 9 al 31 de xineru de 2020 y na Sala 1 del Valey Centro Cultural de Castrillón dende'l 7 hasta'l 29 de febreru de 2020.

Información sobre el documento

© Copyright 2006. Gobiernu del Principau d'Asturies