Gobiernu del Principau d'Asturies

Asturies, muncho más cerca

Tas en

Asturias.es Emigrantes El Principáu facilita la repatriación de 85 asturianos atrapaos ...
 

Emigrantes

El Principáu facilita la repatriación de 85 asturianos atrapaos nel estranxeru tres la declaración del estáu d'alarma

Les más d'estes persones, a quien la crisis sanitaria sosprendió-yos n'otros países, tán yá nes sos cases o disponen de billetes pa tornar. El Gobiernu caltién l'asesoramientu a emigrantes nel corréu emigración@asturias.org

27/03/2020

El Principáu emprestó sofitu hasta agora a 85 asturianos a quien la declaración del estáu d'alarma sosprendió-yos n'otru país y con series dificultaes para tornar. En concreto, 73 d'eses persones atópense yá nes sos cases y otres 9 disponen de los billetes de vuelta, polo que prevése que lleguen a Asturies nos díes próximos.

L'Executivu trabaya pa llograr la repatriación d'otros dos, que s'atopen en Perú y Ecuador y tienen más problemes para viaxar, mentes qu'una persona más optó por permanecer en Xapón.

Amás, el Principáu sigue emprestando ayuda y asesoramientu de toa mena a la comunidá d'asturianos residentes nel esterior que pasa mayores dificultaes, sobre manera en Llatinoamérica, al traviés del corréu electrónicu emigración@asturias.org . Por mediu d'esti contactu, y en coordinación con consulaos, embaxaes y conseyos de residentes españoles nel estranxeru, fixo posible la repatriación de los asturianos atrapaos nel estranxeru.

L’área d'Emigración facilitó tamién información pa qu’estes persones puedan realizar el test del coronavirus dempués del viaxe y primero de volver a la so residencia habitual, y pa que sigan el protocolu de cuarentena al tornar a les cases compartíes, en dalgún casu con persones de riesgu. Tamién-yos ufiertó asesoramientu sobre los convenios en materia sanitaria ente España y los países en que s'atopen. Asina mesmo, garantizó l'acompañamientu a los afectaos nel procesu de regresu a Asturies.

Los llugares de procedencia de les persones repatriaes, bien por estancies temporales, estudios, trabayu o turismu son los siguientes: Reinu Xuníu (11), Xordania (2), Holanda (2), Malta (1), Alemaña (3), Bélxica (5), Italia (3), Francia (3), Chile (2), Puertu Ricu (3), República Dominicana (5), Cuba (3), México (5), Colombia (7), Perú (6), Ecuador (2), Estaos Xuníos (5), Madagascar (2), Sierra Lleona (2), Mozambique (3), Senegal (5), Xapón (1) y Portugal (4).



Sofitu a la comunidá asturiana residente n'América

Nel casu de los residentes n'América, detectáronse dos tipos de consultes. Per un llau, les de persones en situación de vulnerabilidá, en que los sos casos a la precariedá anterior a esta crisis s’añede agora la xenerada poles midíes dispuestes nos sos países de residencia, qu'afonden nel so empobrecimientu. Esti tipu d'entrugues recibiéronse dende Venezuela (25), Arxentina (47), México (3), Uruguai (2), Chile (5), Colombia (1) y Ecuador (1).

L'otru grupu, menos numberosu, incluye consultes de persones que perciben dalgún tipu d'ayuda del Gobiernu d'España y treslladen la so molición pol caltenimientu de les mesmes y los trámites pa la so xestión alministrativa.

El Principáu sigue emprestando ayuda a persones emigrantes retornaes a Asturies primero de la epidemia y, sobre manera, a les que la crisis sanitaria complica la so situación de fraxilidá.


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies