Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Principáu resuelve la concesión de les ayudes Severo Ochoa pa ...
 

Actualidá

El Principáu resuelve la concesión de les ayudes Severo Ochoa pa contratar a 65 investigadores predoctorales

Les persones beneficiaries, diez más qu’en convocatories anteriores, van incorporase a la Universidá d'Uviéu y a centros d'investigación mientres cuatro años. La Conseyería de Ciencia quier incrementar el númberu de places d'esti programa pa fomentar la captación y retención de talentu

17/10/2019

El Gobiernu d'Asturies resolvió la concesión de les ayudes Severo Ochoa pa la contratación de 65 investigadores predoctorales, diez más qu’en convocatories anteriores. Les persones escoyíes van incorporase con un contratu de cuatro años a un departamentu de la Universidá d'Uviéu o centru d'investigación, onde van realizar la so tesis doctoral.

La Conseyería de Ciencia, Innovación y Universidá prevé, en función de la disponibilidá presupuestaria, incrementar el númberu de xente mozo que puede acoyese a esti programa na convocatoria del 2020.

Les ayudes Severo Ochoa tán destinaes a fomentar la formación docente y investigadora d'estudiantes de doctoráu pa que realicen la so tesis. A la convocatoria d'anguaño presentáronse 169 solicitúes, lo que manifiesta l’éxitu y l’interés d'esti programa ente doctorandos nuevos.

En caúna de les cinco árees de conocencia: Artes y Humanidaes, Ciencies, Ciencies de la Salú, Ciencies Sociales y Xurídiques y Inxeniería y Arquitectura, resulten escoyíes les 9 persones con meyor puntuación, hasta un total de 45. El restu (20 doctorandos nuevos) escuéyese ente les notes más elevaes, independientemente del área a la que pertenezan. El presupuestu pa la contratación d'esti personal ronda los 5,2 millones d'euros en cuatro años.

Asturies cunta anguaño con unos 120 investigadores del programa Severo Ochoa, a los que van se sumase d’equí a poco les 65 persones escoyíes agora. El conseyeru de Ciencia, Borja Sánchez, aseguró que unu de los oxetivos del so departamentu ye apostar por esti programa y siguir incrementando'l númberu d'investigadores que puedan beneficiase d'estes ayudes na midida de les posibilidaes económiques. “Ye un programa estratéxicu, clave pa los mozos que deseyen empezar na carrera investigadora, y constituye una forma escelente d'invertir n'investigación”, sorrayó.

Les ayudes Severo Ochoa abren una vía de retención y atracción de talentu, yá que pueden ser determinantes pa qu'estudiantes estranxeros que cursen un máster na Universidá d'Uviéu decidan quedase y realizar el doctoráu.

La resolución d'esta convocatoria ye provisional, yá qu’agora ábrense los plazos alministrativos de reclamaciones y movimientu de llistes. Sicasí, la directora xeneral d'Universidá, Cristina González Morán, confía en que toles persones beneficiaries tean yá nos sos centros d'investigación en xineru, de la qu'estima l'esfuerciu realizáu por tol personal del serviciu de xestión universitaria. Ello ye que se considera que los cambeos que puede esperimentar esta resolución sían puntuales, polo que los más de los investigadores pueden yá planiar el so futuru profesional pa los cuatro años próximos.

Esti programa pon en valor la calidá del sistema d'investigación n'Asturies, yá que detrás de cada persona que llogra una ayuda hai un director o directora de tesis, que'l so currículum puntúa na baremación, asina como la producción científica del so grupu d'investigación.



Actualización retribuciones d'investigadores predoctorales

El Principáu tamién realizó los trámites necesarios p'actualizar les retribuciones d'investigadores predoctorales al marcu qu'afita l'Estatutu de Personal Investigador en Formación (EPIF). Esti aumentu retributivu va empezar a aplicase previsiblemente a primeros del 2020, y va incluyir los atrasos correspondientes en cada casu particular. Esta actualización va suponer pal Principáu un desembolsu adicional de 1,6 millones.

L’EPIF ye d'aplicación esclusiva a investigadores predoctorales y, nel casu d'Asturies, solo afecta a los beneficiarios de les ayudes Severo Ochoa.

   Icono gráfico alusivo al tipo de archivo Audiu (Audiu: 401 Kb) (n'español)

Información sobre el documento

© Copyright 2006. Gobierno del Principado de Asturias