Gobiernu del Principau d'Asturies

Asturies, muncho más cerca

Tas en

Asturias.es Temes Ociu y tiempo llibre Asturies reivindícase en Fitur como la capital quesera del mundu ...
 

Ociu y tiempo llibre

Asturies reivindícase en Fitur como la capital quesera del mundu nel 2020

Más de 3. 000 quesos van participar nel concursu World Cheese Awards, eventu central del Asturies Paraísu Natural International Cheese Festival que se va celebrar en payares n’Uviéu

24/01/2020

La directora xeneral de Desenvolvimientu Rural y Industries Agraries, Begoña López, resaltó güei en Madrid qu’Asturies va convertise nel 2020 na capital quesera del mundu. López presentó na Feria Internacional de Turismu (Fitur), l’Asturies Paraísu Natural International Cheese Festival, el certame de quesos más importante del mundu, que se va celebrar n’Uviéu del 4 y al 7 de payares.

El festival acueye como actu central la 33 edición de los World Cheese Awards, un concursu qu’otorga’l premiu al meyor quesu del mundu y nel que ta previsto que participen más de 3.000 quesos y 300 xueces internacionales encargaos d’escoyer los meyores.

Ente les actividaes previstes destaca la celebración del primer congresu científicu del quesu, la participación de restauradores de sonadía o la creación d’un espaciu de fusión de gastronomía y de comedia abiertu al públicu llamáu Gastro Cheese Comedy. Amás, van entamase degustaciones, esperiencies y prebes onde los Alimentos del paraísu van ser los protagonistes.

El certame, qu’incluye tamién una exhibición de productos, va atrayer a Asturies a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu.

Begoña López destacó que la cita va impulsar la proyección internacional d’Asturies, xunto a los quesos y la industria agroalimentaria rexonal. Tamién valoró la oportunidá que s’abre pa pa dar a conocer los productos que formen parte de la marca Alimentos del paraísu, vinculaos al territoriu y a parámetros de sostenibilidá, elementos diferenciadores que-yos dan un valor añedíu y son cada vez más apreciaos nun mercáu global.

   Icono gráfico alusivo al tipo de archivo Audiu (Audiu: 474 Kb) (n'español)

Información sobre el documento

© Copyright 2006. Gobiernu del Principau d'Asturies