Gobiernu del Principau d'Asturies

Asturies, muncho más cerca

Tas en

Asturias.es El Principáu, el Conceyu d’Uviéu y la Delegación del Gobiernu ...
 

Aniciu

El Principáu, el Conceyu d’Uviéu y la Delegación del Gobiernu condenen l’asesinatu por violencia de xéneru de Susana Criado Antón

Trátase de la segunda víctima mortal por esta causa na comunidá no que va d’añu. Les trés instituciones convocaron una concentración de refugu énte’l consistoriu uviedín, güei, a les 13:00 hores

15/09/2020

El Principáu, el Conceyu d’Uviéu y la Delegación del Gobiernu n’Asturies manifiesten el so condena más enérxica y la so consternación fonda pol asesinatu de Susana Criado Antón. Trátase del segundu episodiu mortal por violencia de xéneru rexistráu na comunidá no que va d’añu.

N’España, según los últimos datos publicaos, contabilícense 32 víctimes mortales por violencia machista, a los que se sumaría agora esti crime nuevu. Nel momentu de los fechos nun existía denuncia dalguna contra’l deteníu, pareya de la finada, nin midíes de protección pa la víctima.

Les trés instituciones quieren treslladar el so duelgu a la familia, a les sos amistaes y a quien ufierten los servicios d’asesoramientu xurídicu y sofitu previstos pa estes situaciones. Amás, quieren tresmitir a la sociedá asturiana la necesidá d’un compromisu colectivu p’acabar con esta clas de violencia sobre les muyeres.

Tamién aconseyen a les muyeres que tán sufriendo violencia de xéneru que nun ruempan en solitario col maltratador y que se dirixan a les alministraciones públiques o a les organizaciones espertes na materia. Nesti sentíu, recuerden la existencia d’una rede de servicios especializaos a les víctimes d’esta situación que garantiza’l so derechu a la información, a l’asistencia, a la protección y la recuperación integral, como son los centros asesores de la muyer, el serviciu telefónicu d’información 016 y el 112 énte posibles emerxencies.

El Principáu, el Conceyu d’Uviéu y la Delegación de Gobiernu n’Asturies convocaron una concentración de refugu énte’l consistoriu uviedín a les 13:00 hores de güei. Les trés instituciones conviden a participar a tola ciudadanía pa espresar la repulsa unánime de la sociedá asturiana énte la violencia contra les muyeres.

Información sobre el documento

© Copyright 2006. Gobiernu del Principau d'Asturies