Gobierno del Principado de Asturias

Asturias, mucho más cerca

Estás en

Aniciu Pa tí Emigrantes Emigrantes El Principáu concede 52.900 euros n’ayudas a los 24 alumnos que ...
 

Emigrantes

El Principáu concede 52.900 euros n’ayudas a los 24 alumnos que van asistir en xunetu a la Escuela de Branu d’Asturianía

Nel cursu van participar descendientes d'emigrantes procedentes d'Arxentina, Chile, México, Uruguai y Estaos Xuníos. El Gobiernu autonómicu aprueba 8. 000 euros en subvenciones para seis persones retornaes de Venezuela, México y Brasil

07/04/2019

El Gobiernu d'Asturies va conceder 52.900 euros en subvenciones a les 24 persones que van participar nel segundu cursu de la sesta promoción de la Escuela de Branu d'Asturianía, que se va celebrar en xunetu. Del total d'alumnos, 11 van cursar la especialidá de gaita y 13, la de bailles tradicionales.

Esta edición va cuntar con descendientes d'emigrantes que moren n'otres comunidaes españoles, en Hispanoamérica y Estaos Xuníos. En concreto, 10 vienen de Arxentina (Tucumán, Bonos Aires, Santa Fe, Comodoro Rivadavia, La Plata y Paraná), 4 de Chile (Santiago de Chile y Valparaíso), 2 de México, 1 d'Uruguai, 1 d'Estaos Xuníos (Miami) y 6 de centros y cases d'Asturies en Madrid, Alcobendas, Guadarrama, Valladolid y Alicante.

La Escuela de Branu d'Asturianía ye unu de los programes más relevantes de sofitu a la emigración dende la so puesta en marcha en 2002 y cada promoción consta de trés cursos, con un total de 300 hores d'enseñanza. Ta empobinada a la formación de monitores en cultura asturiana nes especialidaes de baille tradicional y gaita, pa qu‘estos, al empar, se conviertan convertir en profesores de dambes disciplines nos sos llugares d'orixe.

Per otru llau, el Gobiernu d'Asturies tamién autorizó seis ayudes pa persones retornaes por importe de 8.000 euros. Esti ye'l primer espediente de subvenciones a la torna concedíes anguaño a emigrantes asturianos o descendientes que s'atopen en situación de precariedá económica, llaboral y social y que decidieron asitiase nel Principáu. Cuatro de los beneficiarios vienen de Venezuela, unu de México y otru de Brasil.

Para esti exerciciu, el Principáu dispunxo nel presupuestu una partida inicial de 88.000 euros, un 120% superior a la conseñada en 2018, énte la previsión de que se caltenga'l fluxu migratorio pol agravamientu de la crisis en países como Venezuela. Esta situación provocó un importante crecimientu del importe de les ayudes concedíes nesta llexislatura: 24.967 euros en 2015, 72.800 en 2016, 97.600 en 2017 y 112.950 en 2018.

Mientres el periodu 2015-2018, el Gobiernu d'Asturies concedió 197 ayudes a la torna por importe de 308.317 euros, de les que 126 (el 64%) foi pa emigrantes y descendientes procedentes de Venezuela.

 

Información sobre el documento

© Copyright 2006. Gobierno del Principado de Asturias