Gobiernu del Principau d'Asturies

Asturies, muncho más cerca

Tas en

Asturias.es Temes Investigación El Gobiernu d’Asturies pon en marcha’l programa Misiones ...
 

Investigación

El Gobiernu d’Asturies pon en marcha’l programa Misiones Científiques pa la creación de consorcios d’investigación y innovación

La Conseyería de Ciencia, Innovación y Universidá publica les bases que van regular la concesión d’ayudes. El Principáu va destinar 400. 000 euros a la preparación de propuestes centraes nel avieyamientu activu o na mengua d’emisiones contaminantes

11/09/2020

La Conseyería de Ciencia, Innovación y Universidá acaba de publicar les bases reguladores del programa Misiones Científiques del Principáu d’Asturies, col que busca incentivar la creación de consorcios público-privaos pa que presenten proyectos d’investigación y innovación competitivos. Les propuestes han tar enmarcaes nos ámbitos de la llonxevidá y avieyamientu activu, o na mengua d’emisiones y gases d’efectu invernaderu.

D’equí n’adelantre, va publicase una convocatoria de 400.000 euros para la composición de los consorcios, recoyida y tratamientu de datos, preparación d’estudios y establecimientu de pruebes pilotu de cara a definir les propuestes concretes que puedan optar a financiación nacional y europea pal so desenvolvimientu.

D’esta forma, vuelve a entamase’l procesu de Misiones, paralizáu pola pandemia y que les sos llinies estratéxiques de la I+D+i hasta’l 2030 –llonxevidá y mengua d’emisiones- quedaron definíes en xineru por un grupu de trabayu multidisciplinar con representantes de la Universidá d’Uviéu, organismos d’investigación, centros tecnolóxicos y empreses.

Les Misiones Científiques son un conxuntu d’iniciatives pa dar soluciones a problemes concretos, tienen que tener una dirección clara y ser interdisciplinares, midibles y llimitaes nel tiempu.

Les dos llinies d’especialización alcordaes n’Asturies son:


Llonxevidá y avieyamientu activu

El retu ye aumentar el porcentaxe de persones que vive de forma autónoma más años y con más calidá de vida. Y, pa eso, les propuestes van incidir na prevención de patoloxíes asociaes al avieyamientu, enfermedaes neurodexeneratives y metabóliques, o enfermedaes cróniques. Les árees d’interés garren dende l’análisis xenómicu a l’alimentación, l’usu de big data sobre enfermedaes, el desenvolvimientu de terapies y el tratamientu de la dependencia.


Mengua d’emisiones y gases d’efectu invernaderu

La llinia estratéxica ye desenvolver les tecnoloxíes necesaries pa la mengua d’emisiones. L’oxetivu ye llograr y almacenar enerxía anovable al empar que mengüen les emisiones industriales y l’efectu invernaderu. Les propuestes van poder incluyir actuaciones vinculaes a la economía circular, enerxía anovable, alternatives sostenibles pal usu de carbonu non anovable, aprovechamientu de la enerxía residual o de combustibles derivaos de residuos y producción d’hidróxenu cola gasificación de la biomasa.

Ye importante resaltar que la participación nesta convocatoria ta abierta a toles árees de conocimientu pa que, dende un puntu de vista multidisciplinar y público-priváu, diseñen proyectos y soluciones pa les dos misiones indicaes.

Información sobre el documento

© Copyright 2006. Gobiernu del Principau d'Asturies