Gobiernu del Principau d'Asturies

Asturies, muncho más cerca

Tas en

Asturias.es Temes Consumu L’Axencia de Consumu aconseya que los veceros nun manipulen ...
 

Consumu

L’Axencia de Consumu aconseya que los veceros nun manipulen directamente los alimentos p’aforrar contaxos de COVID-19

Los establecimientos comerciales han garantizar la distancia de seguranza de los sos empleaos y usuarios

21/03/2020

El director de l’Axencia de Seguranza Alimentaria, Sanidá Ambiental y Consumu, José Altolaguirre, aconseya evitar la manipulación directa, polos consumidores, de los alimentos, sobre manera aquellos non envasaos, pa curiar les midíes hixéniques énte’l COVID-19. “L’autoserviciu ha menguase al mínimu necesariu y, de toles maneres, han usase guantes desechables d’un solu usu, que siempre han tar disponibles”, precisó.

Estos conseyos siguen les pautes que marca la Guía de bones práctiques pa los establecimientos del sector comercial, editada polos ministerios de Sanidá y Industria, Comerciu y Turismu.

Igualmente, aconséyase’l pagu con tarxeta de creitu pa evitar l’espardimientu del coronavirus nuevu, la llimpieza del datáfonu (TPV) depués de cada usu y que’l personal de les llinies de caxa use guantes pa cobros n’efectivu. Amás, cola mira de garantizar nos establecimientos la distancia de seguranza d’un mínimu d’un metru, tien que modificase la disposición de los puestos de trabayu, la distribución d’espacios y la organización de turnos, amás de la circulación de persones.

Tanto les midíes d’hixene personal, de llimpieza y de desinfección rigorosa de los locales como les organizatives son fundamentales pa evitar l’espardimientu del virus. Nel mesmu sentíu, aconséyase un sistema de trabayu por turnos, con rotación de trabayadores pa minimizar riesgos ensin que varie l’atención y el serviciu a los veceros.

Pela so parte, los empleaos que manipulen alimentos han llavar les manes con frecuencia con agua y xabón o bien disponer de xel o solución alcohólico n’abonda cantidá pal so turnu y puestu de trabayu. Amás, han tapar la nariz y la boca con pañuelos desechables al tusir y espirriar, llavar les manes nel intre y evitar tocar la cara.

Si los trabayadores presenten síntomes d’enfermedá dixestiva o respiratoria, tienen qu’evitar el contactu colos alimentos y comunicalo a los sos superiores pa que tomen midíes.

En situación de pandemia, tamién se tien qu’aumentar la desinfección de los puestos de trabayu en cada cambéu de turnu, y llavar los uniformes, de forma mecánica, a una temperatura de 60 a 90 ºC.

Aparte, los establecimientos tienen que caltener una ventilación afayadiza y una llimpieza correcta de superficies, mostradores, pomos de puertes, máquines dispensadores, llavabos, teléfonos, suelos y moblame.

L’axencia aconseya l’usu de llexía d’usu domésticu dilío n’agua o cualquier otru desinfestante asemeyao, siempre que se respeten les midíes de protección individual frente a axentes químicos y les fiches de datos de seguranza de los productos.

El funcionamientu de dispensadores de xabón, xel desinfestante y papel desechable tien que se revisar a diario, igual que’l funcionamientu y llimpieza de sanitarios y grifos d’aseos.

Toos estos conseyos tán en llinia colos publicaos apocayá pol Ministeriu de Sanidá pa estos establecimientos, disponibles na páxina web de l’Axencia Española de Seguranza Alimentaria y Nutrición (AESAN).

Pa más información, pue consultase la Guía de bones práctiques pa los establecimientos del sector comercial nesti enllaz:

http://www.aecosan.msssi.gob.es/AECOSAN/docs/documentos/noticias/2020/Buenas__practicas_establecimientos_sector_comercial.pdf


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies