Gobiernu del Principau d'Asturies

Asturies, muncho más cerca

Tas en

Asturias.es Muyeres Más de la metá de les families asturianes opta pola lactancia ...
 

Muyeres

Más de la metá de les families asturianes opta pola lactancia materna pa los sos neños al dexar l’hospital

L’apoyu físicu y emocional a les mas ayuda a promocionar esta forma d’alimentación aconseyada pola Organización Mundial de la Salú. Les ocho árees sanitaries entamen un programa d’actos bien completu, a partir de mañana, pa conmemorar la Selmana Mundial de la Lactancia Materna

13/10/2019

Más de la metá de les families asturianes opta pola lactancia materna pa los sos neños al dexar l’hospital. Nos postreros trés años, el porcentaxe foi aumentando pasu ente pasu y cada vez son más les mas qu’escueyen esta clas d’alimentación nos primeros meses de vida de los naciellos.

La Conseyería de Salú remana dos indicadores pa conocer esta evolución: la tasa de naciellos alimentaos n’esclusiva con lactancia materna nel momentu del alta hospitalaria, qu’anguaño algama’l 55,55 %, y esa tasa nel cuartu mes de vida, que llega al 34,9 %. Nel 2018, estes cifres asitiábense nel 54,24 % y el 32,65 %, respectivamente y, nel 2017, nel 48 % y el 32,61 %.

Pa fomentar la lactancia materna ye fundamental la divulgación de conocimientos, amás del apoyu físicu y emocional a les madres y a les families, qu’escueyen llibremente esta clas d’alimentación.

Salú tamién trabaya con otros indicadores qu’ayuden a promover la lactancia y que tán rellacionaos col vínculu afectivu ente la madre y el neñu nes primeres hores de vida. Nesti sentíu, impulsáronse iniciatives como’l programa d’iniciu precoz de la lactancia materna nel paritoriu y el contactu piel con piel.

Dientro d’esta llinia de trabayu, l’área VIII, con cabecera en Llangréu, dispón d’una guía de bones práctiques que la so implantación empezó nel 2015 y completóse l’añu pasáu. Anguaño, tán realizando’l mesmu proceso les árees V (Xixón), VI (Les Arriondes) y VII (Mieres).

Por cuenta de la Selmana Mundial de la Lactancia Materna, que se celebra a partir de mañana col lema Tenemos que nos empoderar, tenemos que facer posible la lactancia materna, les ocho árees del Serviciu de Salú entamen delles actividaes pa concenciar a la población de la importancia d’esta clas d’alimentación, que supón munches ventayes nutricionales frente a la lleche artificial.

La Organización Mundial de la Salú (OMS) aconseya la lactancia materna de forma esclusiva nos primeros seis meses de vida y complementada con otros alimentos, polo menos, hasta los dos años.



   Icono gráfico alusivo al tipo de archivo Programa d'actos (Pdf: 297 Kb)

Información sobre el documento

© Copyright 2006. Gobiernu del Principau d'Asturies