Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural El Principado presenta en Fitur el Programa Xacobéu 2021 como la ...
 

Patrimoniu Históricu y Cultural

El Principado presenta en Fitur el Programa Xacobéu 2021 como la so gran ufierta turística y cultural pa dinamizar les rutes asturianes del Camín de Santiago

La conseyera de Cultura, Política Llingüística y Turismu, Berta Piñán, afita en 1. 039. 500 euros la inversión del so departamentu pa promoción y actividaes. El plan incluye un gran alcuentru comercial n’Uviéu y una programación estensa a comuña colos conceyos y l’Estáu. Los itinerarios xacobeos d’Asturies recibieron l’añu pasáu 34. 734 pelegrinos, la cantidad más alta rexistrada hasta agora

Berta Piñán y el presidente de Renfe, Isaías Táboas, depués de la rúbrica del alcuerdu

22/01/2020

“El Gobiernu d’Asturies ta embarcáu nun programa d’actividaes escepcional na nuestra historia recién, que va dexar asitiar les rutes asturianes de Compostela nel puestu protagonista que por historia y realidá actual-y correspuende”. Asina introdució güei en Fitur la conseyera de Cultura, Política Llingüística y Turismu, Berta Piñán, la presentación del Programa Xacobéu 2021, el plan que’l Gobiernu punxo en marcha pa dinamizar los caminos de Santiago asturianos en víspores del Añu Xacobéu viniente.

Poco primero de la so intervención, Piñán y la viceconseyera de Turismu, Graciela Blanco, tuvieron la oportunidá d’esplicar les característiques del estand d’Asturies a la reina doña Letizia, en presencia del presidente del Gobiernu del Principáu, Adrián Barbón.

La conseyera señaló que’l 2021 ye una oportunidá única pa impulsar les rutes xacobees asturianes, y confirmó una inversión de 1.039.500 euros dende’l departamentu que dirixe pa promocionar y pa dinamizar culturamente los caminos de Santiago.

El Programa Xacobéu 2021 supón en términos xenerales la execución d’una partida de midíes diseñaes nel Llibru Blancu del Camín de Santiago del Principáu, estructuráu alredor de diez llinies d’actuación y cerca d’un centenar d’acciones concretes. Namás nel 2020 ta prevista la realización de 24 midíes. L’esfuerciu inversor nes acciones de promoción turística ye’l más destacáu del plan tocante a la cantidá, 828.500 euros, pero’l proyectu incluye una programación cultural ambiciosa qu’aprovecha y promueve sinerxes colos conceyos vinculaos al Camín de Santiago y cola alministración del Estáu.

El programa cunta tamién con partíes económiques destinaes a la execución d’actuaciones de caltenimientu en dellos tramos del Camín y distintes midíes que tienen que ver cola meyora de la señalizacion, la regulación del funcionamientu de los albergues ensin ánimu d’arriquecimientu, el sofitu a los proyectos d’innovación tecnolóxica o la seguranza nes rutes asturianes.



Medría del númberu de pelegrinos

Piñán quixo destacar el calter monográficu del estand asturianu en Fitur, dedicáu dafechu a los Caminos de Santiago asturianos, que l’añu pasáu recibieron 34.734 pelegrinos, la cifra más alta rexistrada hasta la fecha y que representa alredor del 10 % del total de los pelegrinos. La conseyera señaló que dende l’últimu añu xacobéu, celebráu nel 2010, el Camín Primitivu dobló’l númberu de pelegrinos, algamando’l 105,1 % de medría, y recordó que la declaración de Patrimoniu de la Humanidá de los Caminos de Santiago del Norte nel 2015 pola Unesco “foi decisiva”.

Nel aspectu promocional destaca la celebración d’un gran alcuentru n’Uviéu, un MarketPlace sobre’l Camín de Santiago “que vien a dar continuidá al nuestru determín de potenciar el Camín como valor turísticu de primer nivel”, señaló la conseyera.

Esti gran alcuentru, llamáu Los caminos de Santiago al traviés d’Asturies, tien trés oxetivos fundamentales: impulsar el desenvolvimientu del texíu empresarial a lo llargo de les rutes xacobees, crear un alcuentru profesional alredor del productu turísticu Camín de Santiago y, a la fin, atrayer a los principales operadores especializaos nes rutes xacobees, en senderismu y en cicloturismu a conocer los itinerarios asturianos.

Amás, el programa tien previstes delles campañes de mena internacional p’averar les rutes a potenciales mercaos esteriores, como Canadá, Irlanda, Corea o Xapón. Delles d’estes acciones van llevase a cabu en collaboración con Turespaña y les demás comunidaes de la marca España Verde.



Actividá cultural nel Camín

Piñán destacó que na aguada específicamente cultural del programa cúntase “con instituciones y sectores qu’hasta la fecha nun s’implicaren de manera especial en rellación col Camín de Santiago”, como ye’l casu de la Orquesta Sinfónica del Principáu d’Asturies, de Llaboral Centru d’Arte y Creación Industrial o del sector teatral, yá incorporáu nel 2019 col proyectu EscenaNorte.

La conseyera anunció qu’Asturies confirmó la so intención de participar nel programa Historietes xacobees, nel ciclu de conciertos d’órganu amás de nel d’orquestes sinfóniques de les comunidaes autónomes del Conseyu Xacobéu, y nuna ventena de propuestes culturales más, como Camín, tierra de cine, Llaboratoriu d’animación, Ciclu itinerante d’artes escéniques de cai, Camín per mar, El Camín en Verde, Pasaporte gastronómicu del Camín, Camín de les estrelles, Ciencia pelegrina o Finxos del Camín.

Na so intervención, fixo una llamada a los conceyos, a les asociaciones del camín, a les asociaciones turístiques, hoteleres y hosteleres y a tolos axentes implicaos “a collaborar estrechamente nel determín d’amosar a los pelegrinos y visitantes la peculiaridá de la nuestra tierra, la nuestra historia y el nuestru patrimoniu cultural”.



Convenios de collaboración

Tamién esti mediudía, la conseyera Berta Piñán representó al Gobiernu del Principáu na firma de dos convenios cola entidá Caixabank y con Renfe con conteníos rellacionaos colos Caminos de Santiago asturianos y a la promoción de la nuestra comunidá .

Asina, l’alcuerdu con Caixabank, que Piñán firmó col Director Territorial Norte de la entidá, Juan Pedro Badiola, ta enmarcáu nel Plan de Dinamización Turística y Acoyida al Visitante. El conveniu recueye la puesta en marcha pola entidá bancaria d’una llinia de financión dirixida a los agospedamientos vinculaos al Camín de Santiago que remociquen los sos establecimientos y a la implantación de negocios nuevos de cara al Xacobéu 2021.

CaixaBank ufierta una llinia de creitu de 1.000 millones, de los que 950 tán destinaos a la renovación y puesta a puntu de los agospedamientos del Camín, y los 50 restantes, a favorecer con microcreitos l’emprendimientu nes poblaciones peles que va la ruta xacobea.

Aparte, y tamién nel actu de presentación del estand d’Asturies, Berta Piñán y el presidente de Renfe, Isaías Táboas, firmaron un alcuerdu p’anovar la collaboración ente’l Gobiernu y la empresa ferroviaria pol interés de promocionar conxuntamente a Asturies como destín turísticu y de negocios, y los servicios de tresporte de ferrocarril.

Información sobre el documento

© Copyright 2006. Gobiernu del Principau d'Asturies