Gobiernu del Principau d'Asturies

Asturies, muncho más cerca

Tas en

Asturias.es Temes Salú Ricardo de Dios y Bernabé González, nomaos nuevos xerentes de ...
 

Salú

Ricardo de Dios y Bernabé González, nomaos nuevos xerentes de les árees sanitaries d'Avilés y Valle del Nalón

El conseyu d'alministración del Sespa designa tamién a Óscar Veiras del Río como director d'Atención Sanitaria y Salú Pública de Xixón

El consejero de Salud, Pablo Fernández Muñiz, preside el consejo de administración del Sespa

16/01/2020

El conseyu d'alministración del Serviciu de Salú del Principáu (Sespa) aprobó güei los nomamientos de los xerentes de les árees sanitaries III (Avilés) y VIII (Valle del Nalón), que van asumir el médicu de familia Ricardo de Dios y l’intensivista especialista en calidá asistencial, Bernabé Fernández, respectivamente. Estos nomamientos van ser publicaos la selmana viniente nel Boletín Oficial del Principáu d’Asturies (BOPA).

El xerente nuevu del área sanitaria III, Ricardo de Dios, foi nos trés años últimos subdirector d'Atención Sanitaria y Salú Publica del área sanitaria IV (Uviéu). Llicenciáu en Medicina y Ciruxía pola Universidá d'Uviéu, el so primer destín como médicu de familia foi'l centru de salú de Daroca (Madrid). En 2002 llega a Xarrio como director médicu d'atención primaria. Equí desempeña les responsabilidaes de coordinador de calidá d'Atención Primaria y Atención Especializada, xefe de serviciu d'Almisión y Documentación Clínica, xerente d'atención primaria y atención especializada, técnicu de salú de primaria y coordinador de formación hasta qu'en 2015 incorpórase al área sanitaria IV como médicu d'almisión y documentación clínica.

L'actual responsable de calidá de la Dirección Xeneral de Planificación Sanitaria de la Conseyería de Salú, Bernabé Fernández, va ser el xerente nuevu del area sanitaria VIII, onde empezó en 1995 la so vida profesional como facultativu especialista nel Hospital Valle del Nalón. Equí foi xefe del Serviciu d'Urxencies ente 1997 y 2000. Dende 2007 ye'l secretariu del comité d'ética pa l'atención sanitaria del área.

Llicenciáu en Medicina y Ciruxía pola Universidá d'Uviéu, especializóse en Medicina Intensiva nel Hospital Miguel Servet de Zaragoza. Ye máster en Seguridá del Paciente y Calidá Asistencial pola Universidá Miguel Hernández y espertu universitariu en Xestión d'Unidaes Clíniques.

Dende 2004 desempeña responsabilidaes rellacionaes cola calidá asistencial y seguridá del paciente na atención sanitaria y la xestión clínica, como coordinador de calidá nel área sanitaria VIII y dende 2016 nel Serviciu de Calidá, Sistemes y Tecnoloxíes de la Dirección Xeneral de Calidá, Tresformamientu y Xestión de la Conocencia del Principáu.

Asina mesmo, nesti conseyu d'alministración estraordinariu nomóse director d'Atención Sanitaria y Salú Pública del área V (Xixón) al médicu de familia Óscar Veiras del Río. Llicenciáu en Medicina y Ciruxía pola Universidá de Santiago de Compostela y espertu universitariu del Programa Modular de Dirección Médica y Xestión Clínica de la UNED pol Institutu Carlos III, exerció en centros de salú d'Asturies y Lugo, y nos servicios d'Atención Continuada (SAC). En 2011 asume la xerencia d'atención primaria del área V. Foi'l responsable de la Estratexa pa un Enfoque Nuevu de l'Atención Primaria d'Asturies, amás de xefe d'estudios de la Unidá Docente Multiprofesional d'Atención Familiar y Comunitaria de la Conseyería de Salú.

Información sobre el documento

© Copyright 2006. Gobiernu del Principau d'Asturies