Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural La celebración del Día Européu del Camín de Santiago queda ...
 

Patrimoniu Históricu y Cultural

La celebración del Día Européu del Camín de Santiago queda aplazada hasta la seronda viniente

La federación que xestiona esta ruta a nivel continental reorganiza'l so funcionamientu de cara al Añu Xacobéu 2021

01/04/2020

La Federación Europea del Camín de Santiago anunció güei que, de resultes de la crisis sanitaria provocada pol COVID-19, la celebración del Día Européu del Camín de Santiago, prevista para la segunda fin de selmana del mes de mayu, queda aplazada hasta la seronda.

Esta decisión tomóse nuna xunta técnica desenvuelta al traviés de videoconferencia na que participó'l director xeneral de Cultura y Patrimoniu, Pablo León, xunto a representantes de ciudaes y rexones de Portugal, España, Francia, Países Baxos, Bélxica, Polonia, Italia y Lituania.

La iniciativa d'esta celebración surdió l’añu pasáu tres una propuesta realizada por Asturies. La primer edición tuvo llugar n'ochobre, cola organización de más de 50 eventos simultáneos en distintos países europeos, qu'incluyeron dende visites guiaes por distintos tramos de la ruta xacobea a espectáculos musicales y escénicos.

Amás d'analizar la situación del Camín de Santiago nel contestu de la crisis sanitaria, na xunta encaróse l'empiezu del procesu de reforzamientu internu de la Federación Europea, cola mira de reorganizar el so funcionamientu y impulsar la so actividá en víspores de la celebración en 2021 del próximu Añu Santu Xacobéu y del décimu aniversariu de la mesma organización.

Esta fundación europea ye l'organismu que xestiona'l Camín de Santiago en cuantes qu'Itinerariu Cultural Européu énte la UE. Tamién ye la entidá responsable de garantizar la visibilidá afayadiza de la ruta a nivel continental, impulsando programes y proyectos d'estudiu, espardimientu y divulgación del itinerariu.

Información sobre el documento

© Copyright 2006. Gobiernu del Principau d'Asturies