Gobierno del Principado de Asturias

Asturias, mucho más cerca

Estás en

Aniciu Temes Infraestructures y territoriu Rexistru de planiamientu y xestión urbanística El Principáu avanza na constitución del área metropolitana cola ...
 

Rexistru de planiamientu y xestión urbanística

El Principáu avanza na constitución del área metropolitana cola presentación del plan de movilidá

La zona central va rexise pola fórmula de la conferencia ensin necesidá de crear un órganu o estructura específicos. Los alcuerdos van ser vinculantes pa les alministraciones que firmen el conveniu y les discrepancies van solucionase por un sistema de votu ponderáu

Un momento de la reunión mantenida

20/12/2018

El conseyeru d'Infraestructures, Ordenación del Territoriu y Mediu Ambiente, Fernando Lastra Valdés, presentó güei al grupu de trabayu de la zona central el borrador del plan pa la movilidá multimodal del área metropolitana, redactáu pola consultora Doymo baxo la dirección de l'Axencia Asturiana de Tresportes y Movilidá. Pa la so ellaboración estudiáronse 39 conceyos, nos que reside'l 88 % de la población, y que representen el 28 % del territoriu de la comunidá.

El borrador va sometese a información pública mientres dos meses y depués va ellaborase un informe de contestación a les allegaciones recibíes. Desque s’incorporen les aportaciones que s'envaloren oportunes, va redactase y va divulgase’l documentu definitivu.

La reunión de güei tamién sirvió pa dar el vistu bonu a un modelu de conveniu de collaboración ente les trés alministraciones pa poner en marcha l'ámbitu metropolitanu central d'Asturies. Sobre la base d'esti alcuerdu, l’área nun va precisar d'un órganu o estructura burocrática nueva, sinón que va rexise pola fórmula de la conferencia, basada na voluntariedá y con ámbitos de participación técnicos y institucionales.

Lastra esplicó que va tratase “d'un llugar de participación onde'l restu d'axentes sociales llamaos a participar (colexos profesionales, organizaciones empresariales y sindicales…) tengan un calce pa espresar les sos opiniones y participar d'una manera efectiva nel desenvolvimientu del acontecimientu metropolitanu d'Asturies”.

Esta fórmula prioriza la unanimidá como oxetivu na rellación política, lo que precisa de debate y de l’adopción posterior d'alcuerdos vinculantes pa les alministraciones firmantes del conveniu. En casu de discrepancia, propónse un sistema de votu ponderáu acorde a la población. Con esti sistema, los conceyos, incluyida la Federación Asturiana de Conceyos (FACC), tendríen la mayoría, mentes que'l Principáu y l'Estáu van repartise n'igualdá de condiciones el 49 % restante.

El testu del conveniu de collaboración ha ser ratificáu poles corporaciones locales a empiezos d'añu y primero de la so firma, que va suponer l'impulsu definitivu a la constitución del ámbitu metropolitanu.

 

Información sobre el documento

© Copyright 2006. Gobierno del Principado de Asturias