Gobiernu del Principau d'Asturies

Asturies, muncho más cerca

Tas en

Asturias.es Temes Salú Salú estudia posibles casos de paperes n’adolescentes de dellos ...
 

Salú

Salú estudia posibles casos de paperes n’adolescentes de dellos centros escolares

El Serviciu de Vixilancia Epidemiolóxica recibió esti mes trés notificaciones médiques de parotiditis, ún d’ellos n’edá escolar. La vacunación redució un 86 % la incidencia d’esta enfermedá infectocontaxosa n’Asturies

22/01/2020

La Conseyería de Salú ta estudiando les comunicaciones a les families del Colexu Internacional Meres y Auseva sobre posibles casos de parotiditis –popularmente, paperes- ente los sos alumnos de bachilleratu, amás de n’otros centros educativos del área sanitaria IV (Uviéu y otros conceyos de la zona central).

El Serviciu de Vixilancia Epidemiolóxica recibió esti mes la notificación médica de trés casos, que correspuenden a varones de les árees VIII (Nalón), V (Xixón) y IV (Uviéu). Esti postreru ye una sospecha clínica ensin confirmación pol llaboratoriu d’un alumnu de 17 años del Colexu Internacional Meres, en Siero. Aparte, nes últimes selmanes el Llaboratoriu de Microbioloxía del HUCA recibió delles muestres que resultaron negatives.

El mes pasáu notificáronse siete casos con edaes ente los 12 y 74 años. En total, nel 2019 rexistráronse 53 casos n’Asturies, de los que 9 yeren adolescentes de 15 a 19 años d’edá.

Nesti sieglu hubo trés brotos epidémicos de ‘paperes’, nel 2002, 2007 y 2012-13. Nesti últimu periodu confirmáronse 2.900 contaxos.

La inmunización de les paperes, incluyida nel calendariu vacunal infantil dende 1982, forma parte de la llamada triple vírica (sarampión, parotiditis y rubeola). Alminístrase a los 12 meses con un recuerdu a los 3 años d’edá. Esta profilaxis foi quién a menguar nun 86 % la incidencia d’esta enfermedá que cursa fiebre y inflamación d’una o delles glándules salivales parótides.



Prevención y tratamientu

El virus tresmítase pela saliva al traviés del aire o por contactu directu con una persona infectada, sobre manera dos díes primero y hasta 4 díes depués d’empezar la enfermedá.

El periodu d’incubación ye de 16 a 18 díes. Trés de cada diez casos nun presenten síntomes pero sí puen tresmitir esti virus.

Los espertos en Salú Pública aconseyen a les persones diagnosticaes que nun vaigan nos 5 díes depués d’empezar la fiebre y la hinchadura (tumefacción parotídea) a los centros educativos nin sitios de trabayu pa evitar l’andanciu.

El tratamientu de les ‘paperes’ ye sintomáticu, con analxésicos y antitérmicos. Nun tán indicaos los antibióticos, sacante nel casu de complicaciones bacterianes. Aconséyase beber munchu líquidu y evitar los alimentos que favorecen la salivación como los ácidos.

La Dirección de Salú Pública de la Conseyería de Salú ta ellaborando una guía pequeña con preguntes frecuentes sobre les ‘paperes’ que va tar disponible a partir de mañana na web Astursalud.

Información sobre el documento

© Copyright 2006. Gobiernu del Principau d'Asturies