Gobiernu del Principau d'Asturies

Asturies, muncho más cerca

Tas en

Asturias.es El Principáu xúntase a la declaración conxunta de la cooperación ...
 

Aniciu

El Principáu xúntase a la declaración conxunta de la cooperación descentralizada del país en respuesta a la crisis de la COVID-19

Comunidaes y conceyos alcuerden un paquete de propuestes para promover el desenvolvimientu sostenible. Destinen casi 2,5 millones a los campamentos de Tinduf y a persones abellugaes palestines

25/05/2020

El Gobiernu d'Asturies xuntóse a la declaración conxunta de les cooperaciones descentralizaes del país (les que practiquen comunidaes autónomes y conceyos) enmarcada na crisis de la COVID-19, por aciu la que s'alcuerden “propuestes imprescindibles pa promover el desenvolvimientu sostenible nun mundu complexu, cambiante ya interdependiente”. Según el testu alcordáu, comunidaes autónomes y entes locales “apostamos por consolidar aliances y consensos políticos y sociales que permitan siguir invirtiendo y contribuyendo a garantizar un presente y un futuru ensin dexar a naide detrás, porque de la crisis sálese cooperando”.

Ante l'impactu de la COVID-19, que va acelerar una tresformación global mesmo a nivel económicu como social y políticu, la cooperación descentralizada propónse abordar los desafíos actuales dende una perspectiva local-global, coordinada y complementaria. Por ello, l'alcuerdu destaca que “la crisis punxo de manifiestu la interdependencia xeográfica y ente los diversos ámbitos del desenvolvimientu: salú, economía, protección social, mediu ambiente... La visión comprehensiva de l'Axenda 2030 ufiértanos una oportunidá pa encarar una crisis como l'actual”.

Per otru llau, señala la necesidá de permediar lo urxente y lo importante: “La gravedá de la situación oblíganos a priorizar tamién aspeutos a mediu y llargu plazu, como la revalorización de los bienes públicos globales, les consecuencies del cambéu climáticu, o les causes de les grandes migraciones”.

Ente los alcuerdos recoyíos figuren los d'avanzar escontra la sostenibilidá, reforzar lo público, amenorgar les fiendes (tamién la dixital) y apostar polo local. Amás, “la respuesta a la pandemia punxo de relevancia l'aportación fundamental de les muyeres”, polo que se propón tamién reforzar l'enfoque de xéneru nestes polítiques.

A lo último, apuéstase por fortalecer la sociedá civil entamada y la so participación nel diseñu, xestión y evaluación de les polítiques públiques, “yá que dende la so cercanía a les poblaciones más vulnerables puede garantizar la defensa de los sos derechos y que naide se quede detrás”. “La solidaridá internacional ye una responsabilidá compartida ya imprescindible pa garantizar el futuru del planeta”, recueye la declaración.



Ayudes pa Tinduf y la población abellugada palestina

A la declaración súmase un xestu conxuntu de solidaridá que tien como oxetivu dar respuesta a la emerxencia de dos poblaciones movíes en situación d'especial vulnerabilidá, agravada pola crisis de la COVID-19: los campamentos saharagüis de Tinduf y los de persones abellugaes palestines, al traviés de l'Axencia de Naciones Xuníes pa los Refuxaos de Palestina n'Oriente Próximu (Unrwa). Les comunidaes apurren, en xunto, 2.455.000 euros.

Les autonomíes, los fondos de cooperación y solidaridá y otres entidaes celebren esta tarde'l seminariu De la crisis sálese cooperando, que puede siguise nel enllaz https://cutt.ly/syPMezR , dende les 18:00 hores. Nel alcuentru apurriránse reflexones pa identificar los principales retos nesti ámbitu y los elementos a tener en cuenta pa tomar de decisiones.

Información sobre el documento

© Copyright 2006. Gobiernu del Principau d'Asturies