Gobierno del Principado de Asturias

Asturias, mucho más cerca

Estás en

Aniciu El Foru de Cooperación Industrial axunta a trés grandes empreses ...
 

Aniciu

El Foru de Cooperación Industrial axunta a trés grandes empreses tractores y 54 pymes para favorecer la cooperación y xenerar negociu

L'alcuentru, impulsáu pol Idepa y la Sociedá Rexonal de Promoción, va facilitar 75 xuntes billaterales col Grupu Daniel Alonso, el Grupu Samoa ya Imasa Inxeniería y Proyectos

La directora general del Idepa y presidenta de la SRP, Eva Pando, en el centro, junto a los representantes del Grupo Daniel Alonso, Grupo Samoa e Imasa Ingeniería y Proyectos

23/05/2019

L'Institutu de Desenvolvimientu Económicu del Principáu (Idepa) y la Sociedá Rexonal de Promoción (SRP) entamen el II Foru de Cooperación Industrial, un eventu qu'axunta a les empreses Grupu Daniel Alonso, Grupu Samoa ya Imasa Inxeniería y Proyectos con 54 pymes asturianes en Llaboral Ciudá de la Cultura. Les trés sociedaes tractores presentaron les sos necesidaes de productos y servicios y los sos representantes participen en 75 xuntes billaterales.

La directora xeneral del Idepa y presidenta de la SRP, Eva Pando, definió l'alcuentru como “una plataforma para texer redes de provisores rexonales ya intensificar la compra de productos y servicios locales, col fin de fortalecer el texíu industrial de la comunidá”.

Pando remarcó la oportunidá que supón el Foru de Cooperación Industrial tanto para les grandes empreses tractores, que tienen la posibilidá d'atopar potenciales suministradores ya incorporalos a la so base de provisores, como pa les pymes asturianes, que pueden averase a les grandes empreses y entrevistase colos sos responsables de compres para presenta-yos los sos productos y servicios.

El Grupu Daniel Alonso tien algame internacional, cuenta con 60 años d'esperiencia na fabricación d'estructures metáliques y ye líder mundial na fabricación de torres eóliques onshore y offshore. La so amplia proyección internacional y la so capacidá esportadora déxa-y tar presente, amás d'en España, en países como India, Brasil, México o Rusia.

El GrupuSamoa atropa más de seis décades d'esperiencia na fabricación automoción, aeronáuticu, oil & gas, agrícola y ferroviariu, ente otros. Cuenta con una fuerte presencia internacional, al traviés de 26 empreses alredor del mundu, y una gran rede de distribución que cubre más d'un centenar de países.

Imasa Inxeniería y Proyectos ye una empresa d'inxeniería y construcción internacional presente en más de 14 naciones. Ta especializada na execución de plantes ya instalaciones industriales y plantes de xeneración d'enerxía, mesmo anovables como convencionales, al traviés del desenvolvimientu de tecnoloxíes propies en ciclos de vapor d'alta eficiencia (ciclu higroscópico).

 

Información sobre el documento

© Copyright 2006. Gobierno del Principado de Asturias