Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá Los equipamientos culturales del Principáu rexistren un aumentu ...
 

Actualidá

Los equipamientos culturales del Principáu rexistren un aumentu notable de l'actividá na ufierta virtual impulsada mientres el confinamientu

L'accesu ye llibre a visites telemátiques a museos y monumentos, vídeos d'esposiciones, talleres lliterarios, alcuentros online con artistes y préstamu de llibros y películes. El Muséu Arqueolóxicu triplica los usuarios de la so web, mentes que'l Belles Artes multiplica les visites a les sos redes y marca un récord col audiovisual sobre'l Tríptico de don Álvaro de Carreño

06/04/2020

El Muséu de Belles Artes lidera la clasificación d'entraes nes páxines web y redes sociales de los equipamientos culturales que dependen directa o orgánicamente del Gobiernu d'Asturies, qu'intensificaron la so ufierta tres el so zarru al públicu por cuenta de la crisis sanitaria. Los datos de la segunda metá de marzu indiquen un aumentu relevante de l'actividá nos formatos online que xestiona la Conseyería de Cultura, Política Llingüística y Turismu.

La ufierta de conteníos culturales na rede del Principáu incluye visites virtuales a museos y monumentos, vídeos d'esposiciones, talleres didácticos y lliterarios y alcuentros en llinia con artistes, amás de les plataformes de préstamu de llibros y películes de les biblioteques públiques.

El director xeneral de Cultura y Patrimoniu, Pablo León, señaló que los datos disponibles de les páxines y redes sociales de los distintos equipamientos “manifiesten aumentos fuertes nes visites y na actividá de los usuarios”. León destacó que los conteníos “son d’accesu llibre y de una calidá contrastada” y manifestó’l so contentu de que “cada día que pasa lleguen a un públicu más numberosu y ayuden a paliar los efectos del confinamientu”.

Dende la declaración del estáu d'alarma, el Muséu de Belles Artes empecipió un programa intensu de publicaciones na so web y nes sos redes sociales, nel que destaca la emisión de vídeos con esplicaciones detallaes de determinaos cuadros de la pinacoteca. L'algame (númberu d'usuarios únicos) de les publicaciones na so cuenta de Facebook mientres marzu asitia en 55.658 persones, un 34,5 % más que'l total de febreru, que foi de 41.361. La comparanza ente marzu de 2020 y 2019 reflexa una xubida del 43,4 %.

L'hestóricu de datos del Belles Artes marcó un finxu de repercusión el 25 de marzu, con 11.500 persones alcanzaes. El récord coincidió cola publicación del primer videu dedicáu a una de les obres pertenecientes a la colección permanente del muséu, concretamente al Tríptico de la Adoración de los Reyes Magos o de Don Álvaro de Carreño.

Tamién el Muséu Arqueolóxicu esperimentó una crecedera considerable nel númberu de visites a la so web: ente febreru y marzu pasó de 1.867 a 4.212. Tamién aumentaron les vistes, de 2.245 a 10.124, y el de páxines visitaes, de 13.207 a 41.169.



Actividá nes biblioteques públiques

La Biblioteca d'Asturies Ramón Pérez de Ayala, n'Uviéu, y la de Xovellanos de Xixón, dambes dependientes de la conseyería, ufierten préstamos gratuitos de llibros electrónicos y películes al traviés de les plataformes e-Biblio y e-Film. Namás na primer selmana del confinamientu, la plataforma de llibros sumó más de mediu millar de préstamos y aumentó el númberu de socios en 140.

No que fai a e-Film, en marzu dexó 2.264 préstamos (frente a los 1.465 de febreru), con una media de visualizaciones que, dende l'empiezu del confinamientu, algama les 107,35 diaries, el doble que nel mes anterior. Esta plataforma suma una media de 60 usuarios al día dende'l 13 de marzu.

Asina mesmo, les biblioteques de la Conseyería de Cultura xeneren una actividá intensa nes redes sociales. Nel casu de Facebook, la cuenta de la Biblioteca d'Asturies incrementó nun 147 % el númberu de visites ente'l 15 y el 31 de marzu, al respective del mesmu periodu del añu anterior. Pela so parte, l'algame total de les publicaciones de la Biblioteca Xovellanos nesta rede social foi de 23.582 usuarios na segunda quincena de marzu, con una media de 763 al día. Al respective de l'actividá en Twitter, les visites al perfil de la Biblioteca d'Asturies incrementáronse dende'l 15 de marzu nun 486 % al respective de la segunda quincena del mesmu mes de 2019.

Otra manera, la conseyería adoptó la decisión estraordinaria de llevantar, mientres dure'l confinamientu, les sanciones a los usuarios que teníen una penalización por devolución tardida d'un llibru, de manera tala que puedan aportar al serviciu de préstamu virtual d’e-Biblio y e-Film.



Centru Cultural Internacional Óscar Niemeyer

El Centru Cultural Internacional Óscar Niemeyer caltién una programación online dende la declaración del estáu d'alarma qu'incluye la publicación de vídeos nel so canal de YouTube sobre esposiciones pasaes, entevistes con artistes o visites virtuales poles instalaciones. En Facebook, la so páxina tuvo en marzu 2.086 visites, con una medría del 76 % al respective al mes anterior, mentes qu’en Twitter algamó los 1.326 visitantes, un 133 % más qu'en febreru. La web del centru tuvo un récord históricu de visites el 12 de marzu, coincidiendo cola declaración del estáu d'alarma.

De la mesma, la Sociedá Pública de Xestión y Promoción Turística y Cultural del Principáu, dependiente de la conseyería, dispunxo una programación cultural amplia nes páxines web y redes sociales de los equipamientos que xestiona: Muséu del Xurásicu, Llaboral Ciudá de la Cultura, Parque de la Prehistoria, Centru d'Arte Rupestre Tito Bustillo y Centru de Recepción y Interpretación del Prerrománicu, qu'incluye actividaes pa neños, talleres lliterarios o visites virtuales a distintos monumentos, como tolos prerrománicos. Por exemplu, la web de Llaboral Ciudá de la Cultura tuvo en marzu 53.249 visitantes.



Cine asturianu en casa

Llaboral Cinemateca ufierta dende'l pasáu 27 de marzu un ciclu de programación pensáu pa esfrutar dende casa nel confinamientu. A lo llargo de cuatro fines de selmana, Laboral Cinemateca en casa fai posible’l visionado gratuitu de llargumetraxes y curtios de realizadores asturianos nel so canal de Vimeo. La propuesta incluye un alcuentru virtual en directo con un realizador cada domingu en Facebook. La web de Cinemateca tuvo en marzu 7.048 visites.

Asina, Laboral Cinemateca en casa pasó de los 433 visionados de la primer fin de selmana, a los 1.031 del pasáu. Los alcuentros colos directores fueron lo más visto de la programación hasta agora: el d’Elisa Cepedal algamó a 2.719 persones y xeneró 819 reproducciones nuna selmana, y el de Tito Montero cunta con 1.796 persones alcanzaes y 595 reproducciones, tan solo un día depués de la so emisión en directo.

Llaboral Centru d'Arte y Creación Industrial tamién reorientó la so actividá espositiva escontra les redes, pa lo qu'aumentó los sos conteníos accesibles. L'algame de les publicaciones d'esti centru en Facebook pasó de 8.317 en marzu de 2019 a 16.910 nel mesmu mes d'anguaño. Les interacciones na so cuenta d’Instagram aumentaron de 1.204 a 5.393 nel mesmu periodu.


Icono gráfico alusivo al tipo de archivo Audiu (Audiu: 452 Kb) (n'españols)

Información sobre el documento

© Copyright 2006. Gobiernu del Principau d'Asturies