Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances El Principáu llanza una llinia de subvenciones de 248.000 euros ...
 

Economía y finances

El Principáu llanza una llinia de subvenciones de 248.000 euros pal área d’influencia del Parque Nacional de Los Picos d’Europa

El Bopa publica güei la convocatoria, dirixida al desenvolvimientu d’actuaciones compatibles cola conservación de la naturaleza y la meyora de la calidá de vida de los habitantes de la contornada. El plazu de presentación de les solicitúes va ampliase tantos díes como quede establecíu l’estáu d’alarma

08/04/2020

El Gobiernu d’Asturies llanza una llinia nueva de subvenciones dotada con 248.000 euros pal área d’influencia socioeconómica del Parque Nacional de Los Picos d’Europa. El Boletín Oficial del Principáu d’Asturies (BOPA) publica güei la convocatoria, de concurrencia competitiva, a la que van poder optar conceyos y entidaes locales pa desenvolver actuaciones que respeten la naturaleza y fomenten la meyora de la calidá de vida de los habitantes de la redolada.

Les ayudes tán destinaes a sofitar actividaes compatibles col caltenimientu de la naturaleza, la integración del parque nacional na realidá comarcal onde s’asitia, la protección del patrimoniu natural, cultural y arquitectónicu, la puesta en valor de los aprovechamientos tradicionales y toes aquelles actuaciones qu’ayuden a la meyora de la calidá de vida de los habitantes de la rodiada del espaciu protexíu.

Pa eso, les subvenciones van otorgase a agrupaciones y corporaciones locales de los conceyos que pongan en marcha esta clas d’iniciatives. Les ayudes tienen calter anual y formen parte del programa específicu de subvenciones del Organismu Autónomu de Parques Nacionales que, dende 1999, promociona’l desenvolvimientu sostenible nes árees d’influencia socioeconómica d’estos espacios protexíos.

El director xeneral del Mediu Natural, David Villar, informó a los conceyos implicaos de la convocatoria, pa facilitar la consecución de los fines que busca esta llinia de subvenciones.

Les solicitúes d’ayuda han presentase nel plazu de 10 díes hábiles, cuntaos a partir del otru día de publicase nel BOPA, un periodu que se va ampliar tantos díes como quede establecíu l’estáu d’alarma pa la xestión de la situación de crisis sanitaria o les sos modificaciones, según el Real Decretu 463/2020, de 14 de marzu.

Esta convocatoria forma parte d’una llinia d’ayudes del Gobiernu d’España, que contempla’l repartu de 3 millones pa favorecer el desenvolvimientu sostenible de les árees d’influencia socioeconómica de los espacios protexíos p’anguaño y que s’asigna a los 15 parques nacionales a tenor de la so superficie y zones perifériques de protección.

Les árees d’influencia socioeconómica tán formaes polos conceyos qu’apurren territoriu a los parques nacionales y, nel so casu, a les sos zones perifériques de protección. N’España, ocupen más de 1.772.000 hectárees y garren 169 localidaes, seis d’elles n’Asturies.

Información sobre el documento

© Copyright 2006. Gobiernu del Principau d'Asturies