Gobiernu del Principau d'Asturies

Asturies, muncho más cerca

Tas en

Asturias.es Temes Xusticia El Principáu aspira a convertise nuna referencia pa la ...
 

Xusticia

El Principáu aspira a convertise nuna referencia pa la modernización de l’Alministración de Xusticia en tol país

La conseyera de Presidencia cree qu'Asturies puede apurrir la so esperiencia nel desplegue de les nueves tecnoloxíes y l'abordaxe del avieyamientu y la dispersión de la población. Camblor señala que la implantación del espediente xudicial y fiscal electrónicu ta teniendo bona acoyida nel sector

23/07/2020

El Principáu aspira a convertise n'una referencia para la modernización de l'Alministración de Xusticia en tol país. La conseyera de Presidencia, Rita Camblor, considera qu'Asturies puede apurrir la so esperiencia nel desplegue de les nueves tecnoloxíes de la información y la comunicación nel sector, mesmo que nel abordaxe del avieyamientu y la dispersión de la población.

Camblor, que participa nel plenu de la Conferencia Sectorial de l'Alministración de Xusticia que se celebra en Lerma (Burgos), defende la propuesta del Ministeriu de Xusticia de favorecer la gobernanza conxunta nesti ámbitu ente'l Gobiernu central y les comunidaes autónomes. Al so xuiciu, esti modelu va contribuyir a que'l Principáu apurra les sos conocencies, que pueden ser útiles pal conxuntu del Estáu, a la hora d'acometer la modernización procesal, la implantación de meyores medios telemáticos, la estensión del teletrabayu y el tresformamientu dixital.

“El Gobiernu d'Asturies ta en plenu procesu d'implantación del espediente xudicial y fiscal electrónicu, pa qu'optemos poles mesmes ferramientes y aplicaciones que'l ministeriu, y ta teniendo bien bona acoyida na mayoría de los órganos xudiciales. Lo mesmo asocede col sistema de cita previa y xestión de turnos”, esplicó, de la qu'estimó al Executivu central la so collaboración.

“Ponemos a disposición del ministeriu la información que precise al respective del nuestru sistema, pero tamién queremos que se nos tenga en cuenta pa los proyectos que se vaigan a llevar a cabu”, amestó.



Respaldu a los planes del ministeriu

La titular de Presidencia espresó'l so respaldu a los planes del Gobiernu d'España pa la renovación y modernización del sector y amosó la total disposición del Principáu a collaborar con esti proyectu y a compartir información útil pa dambes alministraciones.

“El proyectu de llei de midíes procesales, tecnolóxiques y de implementación de medios ye bien necesariu, porque la xusticia tien de modernizase y l'usu de los sistemes de videoconferencia ha d'ampliase a más supuestos, lo que va redundar nun meyor serviciu pa la ciudadanía”, aseguró.

Amás, recordó que, daes les característiques de la comunidá, con una población avieyada, dispersión territorial y despoblamientu, el Principáu ta interesáu en cualquier iniciativa qu'implique “la revitalización de territorios desfavorecidos y el caltenimientu de servicios en conceyos pequeños o alloñaos del centru”. Nesti sentíu, consideró que l'anunciu sobre la creación d'oficines municipales de xusticia puede suponer una bona oportunidá: “Tamos interesaos en conocer el proyectu y sumavos a él, si resulta pertinente, en cuanto dispongamos de tola información”, sorrayó.

Información sobre el documento

© Copyright 2006. Gobiernu del Principau d'Asturies