Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies allega a Fitur con un estand ...
 

Aniciu

El Gobiernu d'Asturies allega a Fitur con un estand multisensorial que recrea la naturaleza del Principáu y aumenta l'espaciu dedicáu a les empreses

La zona de negocios crez en 30 metros cuadraos pa impulsar los alcuentros comerciales del sector. L'escenariu central va allugar una trentena de presentaciones d'entidaes públiques y privaes. El Principáu va aprovechar el certame para promocionar los Centenarios Cuadonga 2018 y el II Congresu Mundial sobreDestinos Turísticos Intelixentes que se va celebrar en xunu n'Uviéu

En la presentación el consejero de Empleo, Industria y Turismo, Isacc Pola, y el director general de comercio y Turismo, Julio González Zapico

11/01/2018

El Principáu va participar del 17 al 21 de xineru na Feria Internacional de Turismu de Madrid (Fitur) con un estand multisensorial que recrea'l paisaxe asturianu, inspiráu na campaña Vuelve al Paraísu y en llinia colos oxetivos del Programa de Turismu Sostenible 2020. El conseyeru d'Empléu, Industria y Turismu, Isaac Pola, presentó güei les principales novedaes d'esta edición, a la qu'Asturies asistei con un nuevu pabellón de 660 metros cuadraos, quetien por elementu central un horru que val pa entamar l'espaciu por mediu de paneles en forma de monte.

La superficie crez en 30 metros cuadraos p'ampliar l’área de profesionales y dotala de mayor protagonismu. “L'oxetivu ye convertilo nun verdaderu centru de negocios pa impulsar el llabor de comercialización que desenvuelven los empresarios asturianos en Fitur”, esplicó'l conseyeru. Esta zona tamién se va presentar, per primer vez, como un espaciu independiente con un accesu propiu esternu, lo que-y otorgará mayor esclusividá y relevancia.

L'horru va amosar delles pantalles led conectaes a les redes sociales de Turismu d'Asturies col fin d'amosar que “la tecnoloxía nun entra en conflictu cola tradición, sinón que la complementa y apúrre-y mayor potencial”, añedió Pola. So esti elementu asítiase un espaciu multisensorial que reproduz arumes a mazana y a yerba al pie de soníos reales de la naturaleza. Trátase d'una inmersión sensitiva que forma parte de la obra del Paisaxe Sonoro del Paraísu Natural del artista asturianu Juanjo Palacios y que permite remembrar los golores y soníos del Principáu. A nivel gráficu, van tar presentes los nueve productos turísticos que recueye'l Programa de Turismu Sostenible 2020 (turismu de naturaleza, turismu cultural, turismu rural, activu y deportivu, urbanu, mariña y pueblos marineros, l'industrial, gastronómicu y el Camín de Santiago), magar va tener un papel protagonista la imaxe oficial de los trés centenarios de Cuadonga que se celebren en 2018.

Otru de los espacios empobinaos al públicu ye'l Fotospot, un puntu pa fotografiase virtualmente en dalgún de los iconos turísticos d'Asturies gracies a un gran croma. Con esta iniciativa búscase que los visitantes compartan nes sos redes sociales imáxenes de la rexón. Nel área gastronómica van participar diverses entidaes xestores de Denominaciones d'Orixe ya Indicaciones Xeográfiques Protexíes del Principáu.

Amás, Asturies va presentar per primer vegada los sos recursos turísticos nel salón paralelu Fitur LGTB.

 

Programa profesional y actividaes d'animación

La zona de presentaciones va allugar más de 30 actividaes entamaes pol Principáu, los conceyos y les empreses turístiques. El Gobiernu va promocionar, ente otros asuntos, l'II Congresu Mundial de Destinos Turísticos Intelixentes, que se va celebrar en xunu n'Uviéu; los actos conmemorativos de los Centenarios Cuadonga 2018 (el XIII centenariu de los oríxenes del Reinu d'Asturies; un sieglu de la creación del Parque Nacional del Monte de Cuadonga, anguaño Picos d'Europa, y el primer centenariu de la coronación canónica de la Santina); les etapes asturianes de la Vuelta Ciclista, y la nueva estratexa de promoción d'España Verde, la marca interregional que engloba a les comunidaes de la cornisa cantábrica y que la so presidencia recai anguaño nel Principáu.

Mientres la fin de selmana, el estand va cuntar tamién con un completu programa d'actividaes d'animación gracies a la collaboración de conceyos, contornes y entidaes como les Denominación d'Orixe Protexida Cabrales y Sidra d'Asturies.

Pola destacó qu'Asturies cerró 2017 como l'añu más turísticu de la historia de la comunidá. A falta de conocer los datos oficiales, que l'Institutu Nacional d'Estadística (INE) va publicar a finales d'esti mes, el Principáu yá superó los 2,2 millones de visitantes de 2016. De xineru a payares de 2017, Asturies rexistró un 4,9% más de turistes y un 5,7% más d'estancies que n'esti mesmu periodu del añu anterior. Tanto'l turismu rural, con un 21% más, como l'internacional, con un 5% más, esperimentaron tamién importantes crecederes.

   Icono gráfico alusivo al tipo de archivo Audiu (Audiu: 2 Mb) (n'español)

   Icono gráfico alusivo al tipo de archivo Agenda de presentaciones (Pdf: 403 Kb) (n'español)

Información sobre el documento

© Copyright 2006. Gobiernu del Principau d'Asturies