Gobiernu del Principau d'Asturies

Asturies, muncho más cerca

Tas en

Asturias.es Persones con discapacidá El Gobiernu d'Asturies empecipia la tramitación telemática pa ...
 

Persones con discapacidá

El Gobiernu d'Asturies empecipia la tramitación telemática pa entainar l'asistencia a les persones dependientes nel estáu d'alarma

La llista d'espera pa valoración reduzse un 21 % de xineru a abril, magar la crisis del coronavirus nuevu. La conseyera de Derechos Sociales destaca l'esfuerciu “en tiempu récord” del so departamentu “pa siguir cola xestión ordinaria y nun dexar a naide atrás”

07/04/2020

El Gobiernu d'Asturies decidió empecipiar la tramitación telemática d'espedientes de dependencia pa entainar l'atención y cumplir asina col compromisu adquiríu en setiembre del añu pasáu pola conseyera de Derechos Sociales y Bienestar, Melania Álvarez, de resolver en plazu les solicitúes.

La llista d'espera de valoración de persones con dependencia reducióse un 21 % dende xineru y el númberu de solicitantes qu'aguarden pa percibir la prestación tamién baxó un 12 % nel mesmu periodu. Estes cifres evidencian “un esfuerciu en tiempu récord pa siguir cola xestión ordinaria y nun dexar a naide atrás”, según esplicó Melania Álvarez.

Magar les dificultaes sobreveníes pola crisis sanitaria, el plan de choque pa entainar los espedientes de dependencia, que recueye midíes al curtiu, mediu y llargu plazu pa terminar coles llistes d'espera, sigue vixente. “Afiximos el sistema de valoraciones a la situación actual y caltenemos el compromisu cola sociedá y colos colectivos más vulnerables, que son la nuestra esmolición principal, especialmente nestes circunstancies”, precisó la conseyera.

Álvarez tamién reconoció'l trabayu realizáu polos profesionales del so departamentu. “Magar les circunstancies personales y llaborales tan complexes, supieron afaese a la situación y manifestaron el so compromisu cola sociedá asturiana tamién en tiempos de crisis”, valoró.

La conseyera, que caltuvo esta mañana una xunta por videoconferencia col grupu de trabayu constituyíu na Xunta Xeneral pal siguimientu y evaluación del coronavirus nuevu n'Asturies, informó sobre toles actuaciones puestes en marcha dende la conseyería qu'encabeza pa facer frente a esta emerxencia y destacó’l papel fundamental” de la coordinación sociosanitaria.


Icono gráfico alusivo al tipo de archivo Audiu (Audiu: 469 Kb) (n'español)

Información sobre el documento

© Copyright 2006. Gobiernu del Principau d'Asturies