Gobiernu del Principau d'Asturies

Asturies, muncho más cerca

Tas en

Asturias.es Temes Xusticia El Principáu incrementa les midíes de protección de los ...
 

Xusticia

El Principáu incrementa les midíes de protección de los trabayadores de los xulgaos y de la Fiscalía

Va dotar d'equipos de protección a los profesionales más espuestos a riesgu d'infecciones. El Gobiernu d'Asturies va asitiar mampares y cintes de señalización nos mostradores d'atención al públicu, amás de reforciar la llimpieza y la desinfección nes sedes xudiciales. Los rexistros civiles van abrir n'horariu de mañana y tarde los siete díes de la selmana pa encurtiar los plazos d'emisión de certificaos d'enterramientu

23/03/2020

El Gobiernu Asturies, d’alcuerdu colos encamientos del Ministeriu de Xusticia, va incrementar les midíes de protección frente al coronavirus nuevu ente los trabayadores qu'empresten servicios na Fiscalía y nos xulgaos.

Nos díes próximos, los emplegaos de l'Alministración de Xusticia que tán más espuestos a riesgu d'infección van disponer de mázcares, guantes y xeles de solución hidroalcohólica.

La Viceconsejería de Xusticia yá dispunxo la entrega de guantes y xeles desinfestantes y encargó el suministru de mampares de protección y cintes de señalización pa la so instalación nos llugares d'atención directa al públicu. Pela so parte, les mázcares van ser entregaes directamente pol Ministeriu de Justica, que yá ta organizando les unviaes a les distintes comunidaes autónomes.

Amás d'estes midíes, desque empezó la pandemia reforciáronse les llabores de llimpieza y desinfección de sedes xudiciales, nes que trabaya daqué más del 10 % de la plantiya en servicios mínimos.

El Ministeriu de Xusticia alcordó, asina mesmo, mientres l'estáu d'alerta y dada la escepcionalidá del momentu, encurtiar los plazos d'emisión de los certificaos d'enterramientu que dependen de los rexistros civiles. Pa ello, y con cuenta de poder disponer d'estos documentos nel menor tiempu posible, dispúnxose que los rexistros civiles permanezan abiertos los siete díes de la selmana n'horariu de mañana y de tarde.


Icono gráfico alusivo al tipo de archivo Audiu (Audiu: 530 Kb) (n'español)

Información sobre el documento

© Copyright 2006. Gobiernu del Principau d'Asturies