Gobiernu del Principau d'Asturies

Asturies, muncho más cerca

Tas en

Asturias.es Temes Pesca Ser Pescador El Principáu destaca los avances de la xunta del grupu de ...
 

Ser Pescador

El Principáu destaca los avances de la xunta del grupu de trabayu de la xarda na Secretaría Xeneral de Pesca

La posición del Gobiernu d'Asturies, que reivindica la introducción de criterios de sostenibilidá y dependencia de la flota nel repartu de los swaps, viose reforciada. El conseyeru de Desenvolvimientu Rural, Agroganadería y Pesca manifiesta'l so sofitu a les reivindicaciones de la flota de la rexón

04/02/2020

El Gobiernu d'Asturies valora positivamente los avances que se producieron nel grupu de trabayu de la xarda, tres la xunta celebrada güei en Madrid na Secretaría Xeneral de Pesca, a la qu'asistió una delegación de la flota asturiana encabezada pol director xeneral de Pesca Marítima, Francisco González.

Nel alcuentru, siguióse cola negociación de los criterios qu'han rexir el repartu de les cuotes adicionales provenientes de los intercambios ente especies (swaps). El criteriu del Gobiernu d'Asturies, que reivindica que se realicen teniendo en cuenta criterios socioeconómicos y de dependencia de la flota, viose reforciáu.

Otru de los asuntos que s'analizó ye la posibilidá d'ampliar esti grupu de trabayu a otres especies, lo que dexaría realizar una valoración global de tolos tipos d'exemplares qu'influyen nel sector pesqueru asturianu.

Primeramente, el conseyeru de Desenvolvimientu Rural, Agroganadería y Pesca, Alejandro Calvo, caltuvo una xunta cola delegación asturiana que participa nesti grupu de trabayu de la xarda. Calvo destacó que l'alcuentru contribuyó a fortalecer la posición d'unidá de la rexón y ye una muestra del sofitu del Principáu a les reivindicaciones de la flota pesquera asturiana.

El titular de Desenvolvimientu Rural señaló que la introducción de criterios socioeconómicos y de dependencia na distribución del 60 % de los intercambios d'especies son xustos y necesarios pa que la flota asturiana tenga una rentabilidá mínima y pa la so supervivencia. “Tres seis años complicaos, esto ye un puntu d'inflexón que dexaría compensar los agravios de los años últimos, fundamentalmente na cuota de la xarda”, puntualizó.

Calvo tamién valoró'l trabayu realizáu pola Secretaría Xeneral de Pesca y la bona sintonía colos responsables del Ministeriu d'Agricultura, Pesca y Alimentación.

Información sobre el documento

© Copyright 2006. Gobiernu del Principau d'Asturies