Gobiernu del Principau d'Asturies

Asturies, muncho más cerca

Tas en

Asturias.es Temes Servicios sociales La Llei de Garantía de Derechos y Prestaciones Vitales va ...
 

Servicios sociales

La Llei de Garantía de Derechos y Prestaciones Vitales va ordenar toles ayudes pa persones en situación de vulnerabilidá

La norma afita’l salariu social básicu y entaína cola so tramitación. Incluye midíes pa reforzar l’apoyu a les families con menores y favorecer l’accesu a la vivienda. La Xunta Xeneral empezó güei la tramitación parllamentaria del testu cola comparecencia de la conseyera Pilar Varela

01/02/2019

El proyectu de Llei de Garantía de Derechos y Prestaciones Vitales, que la so tramitación empezó güei na Xunta Xeneral, va dexar ordenar y integrar toles ayudes destinaes a cubrir les necesidaes básiques de persones en situación de vulnerabilidá. La norma busca ufiertar una respuesta más áxil y coordinada de les alministraciones.

El testu llegal quier afitar y ameyorar el salariu social básicu, pa lo qu’incluye midíes empobinaes a entainar cola prestación, exenciones pa los ingresos provinientes del trabayu y de determinaes pensiones, y l’actualización de los programes personalizaos d’incorporación social y llaboral lligaos a la renta mínima. Amás, recueye complementos vitales cola mira d’atender de manera estremada les necesidaes nueves, de la que propón sofitos adicionales pa families con menores y mocedá, miembros con discapacidá y dependencia, o pal arriendu de vivienda, aparte d’un complementu específicu a les pensiones non contributives pa quien viven solos.

La conseyera de Servicios y Derechos Sociales, Pilar Varela, qu’encabezó esta mañana la ronda de comparecencies nel Parllamentu asturianu, destacó la importancia de la norma nueva cola que l’Executivu va llograr facer más eficaz y eficiente la prestación de sofitos sociales, incluyíu’l salariu social básicu, preséu principal d’inclusión nel Principáu.

Asturies caltiénse como la comunidá del réxime xeneral de financiamientu con más cobertura de la renta mínima, con 22.485 families beneficiaries a últimos del 2018. D’elles, el 35 % tienen menores a cargu, el 17 % cunten ente los sos miembros con persones con discapacidá o dependencia, y otru 8 % dispón d’ayuda al arriendu. Amás, cobren el salariu social alredor de 1.700 perceptores de pensiones non contributives que viven solos. Toos ellos pasaríen a beneficiase de los complementos vitales nuevos, lo que va implicar menos cargues alministratives y más axilidá nel accesu a la prestación.

Otra manera, la futura llei trata d’asegurar la cobertura de les necesidaes básiques de menores n’acoyimientu familiar y recueye les garantíes xurídiques p’abonar les compensaciones económiques de manera directa.

Nel ámbitu de la vivienda, aspira a garantizar el derechu de tola población a una casa digna y afayadiza. Pa eso, ente otres midíes, simplifica’l procedimientu de concesión d’ayudes, que pasaríen a concedese de forma directa.

Amás, el testu garantiza unos mínimos comunes en tol territoriu al respective de les ayudes d’emerxencia social que conceden les entidaes locales y pon énfasis especial na atención a la infancia, amás de nes ayudes pal accesu y caltenimientu na vivienda y contra la probeza enerxética.

Dende’l puntu de vista de la xestión, aspira a aumentar l’axilidá na concesión de prestaciones cola homoxeneización de conceptos, l’establecimientu de criterios comunes pa la determinación de la capacidá económica de los beneficiarios y la modernización de procedimientos. Nesti sentíu, prevé l’usu de ferramientes como la declaración responsable, la tramitación simplificada, el réxime de concesión directa pa les subvenciones o l’alministración electrónica.

El testu cuntó pa la so aprobación col preste del Conseyu Asesor de Bienestar Social y de la Comisión Asturiana d’Alministración Local y na so fase de tramitación presentóse a los axentes sociales nel ámbitu de la concertación, a los grupos parllamentarios, a la comisión executiva de la Federación Asturiana de Conceyos (FACC) y a les entidaes del tercer sector d’acción social. Aparte, arriquecióse con delles de les alegaciones recibíos na fase d’información pública (alegaron el sindicatu Comisiones Obreres y el Colexu Oficial de Diplomaos en Trabayu Social y Asistentes Sociales d’Asturies).

 

Información sobre el documento

© Copyright 2006. Gobiernu del Principau d'Asturies