Gobierno del Principado de Asturias

Asturias, mucho más cerca

Estás en

Aniciu Pa tí Persones entamadores Asturies participa nun proyectu internacional p’ameyorar la tasa ...
 

Persones entamadores

Asturies participa nun proyectu internacional p’ameyorar la tasa d’éxitu comercial de les pymes europees

La fundación Ficyt, dependiente de la Conseyería de Ciencia, va desenvolver una metodoloxía pa evaluar la viabilidá de les iniciatives. Más de 17. 000 empreses y 500 axencies y organismos d'Europa van poder beneficiase d'esti programa

31/05/2020

Asturies participa nun proyectu européu que tien por oxetivu ameyorar la tasa d'éxitu nel mercáu de productos o servicios desenvueltos por pequeñes y medianes empreses (pymes). De los resultaos van poder beneficiase más de 17.000 empreses d'Europa, un centenar n'Asturies. La Fundación pal Fomentu de la Investigación Científica Aplicada y la Tecnoloxía (Ficyt), que depende de la Conseyería de Ciencia, Innovación y Universidá, va ser la encargada de desenvolver un métodu que permita evaluar la viabilidá real y la posibilidá d'esplotación d'un proyectu.

Trátase d'una iniciativa innovadora p’ameyorar los procesos de selección de proyectos en convocatories públiques, mesmo rexonales como nacionales. L'oxetivu ye que la financiación se destine a propuestes que'l so resultáu pueda salir al mercáu y llograr rentabilidá. Amás de velar pol destín de fondos públicos a proyectos con garantía de futuru, esti trabayu va permitir disponer d'una ferramienta pervalible pa entidaes que se dediquen a asesorar a entamadores, startups y pymes, y tamién para les mesmes empreses.

El númberu d'axencies y organismos que podrán beneficiase de los resultaos del proyectu asítise en 500 ente tolos socios d'Europa. N'Asturies, seríen unes 14 entidaes, ente les que s'inclúin la Universidá d'Uviéu, centros tecnolóxicos, les cámares de comerciu o los centros d'investigación.

La Ficyt participa nel programa con otros trés socios: l'Axencia Tecnolóxica de la República Checa (TA ČR); Fundecyt (axencia financiadora d'Estremadura) y la Rede Eureka, una entidá europea intergubernamental integrada por 43 países. La presencia d'esta rede ufierta al Principáu una bona oportunidá pa ganar visibilidá internacional.

El proyectu, que lleva por títulu Aprender a ameyorar el potencial d'esplotación de los resultaos de proyectos de Pymes (Learning to enhance exploitation potential of sme Project results), va permiti-y a Asturies cuntar con una metodoloxía pa identificar los meyores indicadores d'evaluación.

La participación nesti tipu d'iniciatives europees ye una de les pieces fundamentales dientro de la estratexa de la Conseyería de Ciencia, Innovación y Universidá pa impulsar la innovación nes pequeñes y medianes empreses. Ye, amás, una alternativa pa potenciar el texíu de startups y de pymes na nuesa comunidá.

Una de les ferramientes que se va utilizar ye la denominada Application Guarantor, desenvuelta n'Austria, qu'ayuda a asegurar que cada proyectu d'innovación financiáu remate con éxitu cola aplicación real nel mercáu.

La Comisión Europea va financiar les xuntes y alcuentros de trabayu necesarios pal desenvolvimientu del proyectu, que va empezar en xunetu y va tener una duración d'un añu.

Información sobre el documento

© Copyright 2006. Gobierno del Principado de Asturias