Gobiernu del Principau d'Asturies

Asturies, muncho más cerca

Tas en

Asturias.es Temes Mediu Ambiente El Principáu va dar prioridá a los proyectos científicos sobre ...
 

Mediu Ambiente

El Principáu va dar prioridá a los proyectos científicos sobre avieyamientu activu y amenorgamientu d'emisiones contaminantes

El conseyeru de Ciencia confía en qu'Asturies lidere una iniciativa pilotu nacional nuna de les dos misiones nes que va trabayase hasta 2030. Borja Sánchez anima a investigadores y empreses a crear consorcios pa captar financiamientu nacional y européu

De izquierda a derecha, la viceconsejera de Medio Ambiente y Cambio Climático, Nieves Roqueñí; el director general de Innovación, Investigación y Transformación Digital, Iván Aitor Lucas, y el consejero de Ciencia, Innovación y Universidad, Borja Sánchez

15/01/2020

El Gobiernu d'Asturies va dar prioridá a los proyectos d'investigación y innovación que s'enmarquen nos ámbitos del avieyamientu activu y llonxevidá, y nel amenorgamientu d'emisiones y gases d'efectu invernaderu. Estes son les dos grandes llinies estratéxiques que van guiar la I+D+i rexonal hasta 2030 y que quedaron definíes esta mañana pol grupu de trabayu del Programa Misiones, integráu tanto pola alministración rexonal como por representantes de la Universidá d'Uviéu, organismos d'investigación, centros tecnolóxicos y empreses.

Amás de movilizar a investigadores y empreses pa presentar propuestes qu'opten a fondos nacionales y europeos, l'oxetivu del Principáu ye qu'Asturies pueda liderar un proyectu pilotu nacional nuna de les misiones alcordaes, que tienen estes característiques:

Avieyamientu activu y llonxevidá. El retu ye aumentar el porcentaxe de persones que vive de forma autónoma mientres más años y con más calidá de vida. Y pa ello, les propuestes van facer fincapié na prevención de patoloxíes asociaes al avieyamientu, enfermedaes neurodexeneratives y metabóliques, o enfermedaes cróniques. Les árees d'interés incluyen dende l'análisis xenómico, l'alimentación, l'usu de big data sobre enfermedaes, desenvolvimientu de terapies, tratamientu de la dependencia o estudios vinculaos al avieyamientu.

Amenorgamientu d'emisiones y gases d'efectu invernaderu. La llinia estratéxica ye desenvolver n'Asturies les tecnoloxíes necesaries pal amenorgamientu d'emisiones. L'oxetivu ye llograr y almacenar enerxía anovable al empar que s'amenorguen les emisiones industriales y l'efectu invernaderu na rexón. El porcentaxe concretu del amenorgamientu d'emisiones va quedar definíu al traviés de los proyectos que se presenten. Les propuestes van poder incluyir actuaciones vinculaes a la economía circular, enerxíes anovables, alternatives sostenibles pal usu de carbonu non anovable, aprovechamientu de les enerxíes residuales o de combustibles derivaos de residuos y producción d'hidróxenu mediante la gasificación de la biomasa.

La Conseyería de Ciencia, Innovación y Universidá confía en que se movilicen pelo menos diez consorcios científico-empresariales que lideren otros tantos proyectos. Asturies cunta con 250 empreses de base tecnolóxica (spin-off) y 352 firmes innovadores, lo que supón un potencial de más de 600 compañíes que podríen xunise a grupos d'investigación pa desenvolver proyectos alliniaos con una de les dos misiones nes que va especializase’l Principáu.

El titular del departamentu, Borja Sánchez, animó tanto a investigadores como a empreses a presentar proyectos y intentar captar fondos nacionales y europeos. Amás, el Gobiernu d'Asturies manifestó la so disposición a “escoyer dos de los proyectos que se presenten y asumir el so financiamientu y puesta en marcha dende'l Principáu a partir del 2021 y en presupuestos socesivos”, indicó Sánchez.

D'equí p'alantre, van publicase les bases reguladores y una convocatoria de 400.000 euros pa la composición de los consorcios, recoyida y tratamientu de datos, preparación d'estudios y establecimientu de pruebes pilotu de cara a definir les propuestes concretes que puedan optar a financiamientu nacional y européu pal so desenvolvimientu.

El director xeneral d'Innovación, Investigación y Tresformamientu Dixital, Iván Aitor Lucas, destacó tamién qu'Asturies ye la comunidá española más avanzada nel procesu de desenvolvimientu de les misiones científiques. L'oxetivu ye cuntar con proyectos yá preparaos cuando s’abra la convocatoria europea, que va esplegar más de 90.000 millones d'euros ente 2021 y 2027 n'acciones d'investigación y innovación, bona parte d'ellos vinculaos al Programa Misiones, una iniciativa que n'Asturies s'enmarca tanto nel Plan de Ciencia, Tecnoloxía y Innovación (PCTI) como na Estratexa d'Especialización Intelixente (RIS3).

A la xunta d'esta mañana asistieron más de 60 representantes de prácticamente toles entidaes participantes nel grupu de trabayu, nel que tán implicaes seis conseyeríes del Gobiernu d'Asturies, la Universidá d'Uviéu, CSIC, centros tecnolóxicos y empreses.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies