Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Artesanía El proyectu de llei de calidá alimentaria del Principáu regula ...
 

Artesanía

El proyectu de llei de calidá alimentaria del Principáu regula la venta directa, les marques de garantía, la producción ecolóxica y l'artesanía

El testu, aprobáu esta selmana pol Conseyu de Gobiernu, va mandase a la Xunta Xeneral pal so debate parllamentariu. El documentu constituye un instrumentu normativu únicu sobre'l tresformamientu y distribución de los productos agroalimentarios

La consejera de Desarrollo Rural y Recursos Naturales, María Jesús Álvarez

20/04/2018

El proyectu de Llei de Defensa y Promoción de la Calidá Alimentaria y la Calidá Diferenciada va dexar al Principáu disponer d'un instrumentu integral y actualizáu de regulación nesti ámbitu. Ente otres novedaes, incorpora materies como la venta directa, consolida'l marcu llegal de les figures de calidá diferenciada y otorga soporte a la producción ecolóxica. Tamién avanza na ordenación de les marques de garantía y dota d’instrumentos de protección a la producción local.

Asina lo anunció güei la conseyera de Desenvolvimientu Rural y Recursos Naturales, María Jesús Álvarez, na presentación d'esta normativa, aprobada esta selmana pol Conseyu de Gobiernu, que “consagra'l marcu pa la producción, tresformamientu, y distribución de la producción agroalimentaria y atropa tola llexislación dispersa hasta agora en normes locales, reales decretos, lleis estatales y reglamentos comunitarios”. El testu, consensuáu colos sectores implicaos, va mandase agora a la Xunta Xeneral del Principáu pa la so tramitación.

La conseyera destacó la inclusión de l'artesanía alimentaria ente la producción agroalimentaria asturiana. Trátase de productos ellaboraos con respetu al mediu ambiente, característiques diferenciales y cola considerancia de producciones controlaes pequeñes. D’alcuerdu con esta definición, “regúlase la figura del artesanu alimentariu, de forma tala que quien tengan acreitada esta condición van poder etiquetar los sos productos con esta denominación”, esplicó.

Álvarez valoró tamién la creación de la figura del artesanu de monte, que va beneficiar a quien ellaboren productos básicamente con materies primes d'estes zones.

 

Reconocencia xurídica

El proyectu establez la reconocencia xurídica de la venta directa cola voluntá d'ameyorar la rentabilidá de les esplotaciones, xenerar empléu, menguar costos, crear conciencia solidaria col mediu rural y contribuyir a una economía sostenible. El reglamentu pal so desenvolvimientu “va afitar los productos y llugares de vienta, como rules, feries, establecimientos minoristes, mercaos municipales o internet. Amás, los productos van poder ser d'orixe agrícola, ganaderu, forestal, cinexéticu, micolóxicu o pesqueru”.

El testu otorga soporte xurídicu y regulador a los productos de calidá diferenciada, dende la producción a la comercialización, y define la naturaleza de les entidaes de xestión. Asina mesmo, la producción ecolóxica encaxa na norma al considerase prioritaria la so promoción y incluyir el Conseyu de la Producción Agraria Ecolóxica como corporación de derechu públicu.

Amás d'incorporar los instrumentos llexislativos últimos, el Principáu recueye nel proyectu conceptos nuevos como la cadena responsable, la trazabilidá, l'autocontrol, el fomentu de la diversidá, la promoción con sentíu territorial, l'impulsu activu del cooperativismu y la contribución de l’agroalimentación a la construcción d'una sociedá más sostenible.

La finalidá esencial del proyectu ye, según sorrayó la titular de Desenvolvimientu Rural, la de fortalecer, fomentar y ameyorar la sostenibilidá y competitividá del sector alimentariu, nun contestu d'economía solidaria, amás de contribuyir a garantizar práctiques equitatives nel comerciu.

Tamién trata de potenciar les iniciatives de los productores y desenvolver les canales curties de comercialización, asegurar la participación de los axentes sociales y económicos o simplificar los trámites burocráticos. Incorpórase, asina mesmo, el réxime de tutela, control y inspección y establezse la tipoloxía d'infracciones y sanciones, xunto colos órganos responsables.

La norma establez periodos transitorios pal tresformamientu de les actuales entidaes xestores de calidá diferenciada en corporaciones de derechu públicu, asina como’l procesu pa implantar el control de la trazabilidá de los productos. Asina mesmo, da respuesta a dos demandes del sector agrariu. D’una parte, establez el sistema p'afitar la representación de les organizaciones profesionales agraries n'Asturies, nel marcu de los procesos electorales correspondientes y, por otra, otorga rangu llegal a les aportaciones directes de les ayudes del Principáu al Sistema Nacional de Seguros Agrarios.

 

 

Información sobre el documento

© Copyright 2006. Gobiernu del Principau d'Asturies