Gobiernu del Principau d'Asturies

Asturies, muncho más cerca

Tas en

Asturias.es Persones entamadores La Conseyería d’Industria recibió 9.170 solicitúes d’espedientes ...
 

Persones entamadores

La Conseyería d’Industria recibió 9.170 solicitúes d’espedientes de regulación d’empléu de magar empezó la crisis sanitaria

El Serviciu de Rellaciones Llaborales yá tramitó 2. 286 ERTE, qu’afecten a 7. 940 persones. El 94 % de los procedimientos presenten causes de fuercia mayor y el sector servicios ye’l más afectáu

31/03/2020

La Conseyería d’Industria, Empléu y Promoción Económica recibió dende’l 11 de marzu y hasta primer hora de la tarde de güei 9.170 solicitúes d’espedientes de regulación temporal d’empléu (ERTE) rellacionaos cola crisis sanitaria. El Serviciu de Rellaciones Llaborales de la Dirección Xeneral d’Empléu y Formación yá tramitó 2.286, qu’afecten a 7.940 persones.

De los ERTE tramitaos, 2.149 (94 %) respuenden a causes de fuercia mayor y impliquen a 7.252 trabayadores, mentes qu’otros 137 débense a causes económiques, técniques, productives y organizatives y afecten a 688 empleaos. Pa los primeros, el númberu de díes de suspensión por permediu ye de 30, el mesmu periodu afitáu pa l’estáu d’alarma. Pa los demás, ye de 90 díes.

Hostelería y hotelería, servicios de restauración y catering a instituciones; peluqueríes y otros tratamientos de guapura, y empreses del comerciu pequeñu siguen como los sectores con más espedientes tramitaos y calcúlase que van copar tamién la mayoría de los presentaos.

Estos datos tienen calter provisional y estimativu, porque’l Serviciu de Rellaciones Llaborales sigue recibiendo solicitúes y procesando les comunicaciones rexistraes dende va una selmana. Sicasí, el ritmu de presentación ralentizóse nos últimos díes.

El director xeneral d’Empléu y Formación, Pedro Fernández-Raigoso, señala que los datos sobre los ERTE ponen de manifiestu la incidencia tan importante de la emerxencia sanitaria sobre l’actividá económica nel Principáu. Tamién destaca que’l Serviciu de Rellaciones Llaborales ta realizando un gran esfuerciu pa entainar cola tramitación d’estos documentos, tanto nos procedimientos alministrativos como na meyora de los sistemes de procesamientu de les comunicaciones.

Nesti sentíu, amás de l’ampliación a diez díes del plazu máximu pa la resolución y notificación pola autoridá llaboral, esta mañana habilitóse un procedimientu col que les empreses puedan consultar na sede electrónica’l númberu asignáu al so espediente de regulación por causes de fuercia mayor y tramiten énte’l Serviciu d’Empléu Estatal (Sepe) les prestaciones pa los sos trabayadores.

TOTAL D’ERTES PRESENTAOS (11-31 DE MARZU) 9.170

 

TOTAL D’ERTES TRAMITAOS

TOTAL POR FUERCIA MAYOR POR OTRES CAUSES
N.u ERTES 2.286 2.149 137
N.u TRBAYADORES AFECTAOS 7.940 7.252 688
N.u MEDIU DE DÍES DE SUSPENSION 30 90

 

Información sobre el documento

© Copyright 2006. Gobiernu del Principau d'Asturies