Gobiernu del Principau d'Asturies

Asturies, muncho más cerca

Tas en

Asturias.es Temes Investigación El consorciu de centros d’investigación entrega les primeres ...
 

Investigación

El consorciu de centros d’investigación entrega les primeres viseres protectores contra’l COVID-19 al personal del HUCA

Les pantalles fabricáronse n’impresión 3D y lleven grabáu un mensaxe d’ánimu pa los profesionales sanitarios. La Conseyería de Ciencia, Innovación y Universidá confirmaron col Institutu de Salú Carlos III el procedimientu llegal pa que se puedan usar de manera esperimental

24/03/2020

Los centros d’investigación asturianos apurrieron les primeres pantalles protectores pa personal sanitario al Hospital Universitariu Central d’Asturies (HUCA). El consorciu lideráu pola Conseyería de Ciencia, Innovación y Universidá y integráu pelos centros d’I+D+I d’ArcelorMittal, ThyssenKrupp y el centru tecnolóxicu Idonial yá tán produciendo dispositivos de protección individual contra’l COVID-19 n’impresión 3D.

El primer llote de más de 70 dispositivos entregóse al personal de la UCI del HUCA por investigadores d’Idonial y ArcelorMittal, amás d’un representante de NormaGrup, que se sumó a collaborar col consorciu.

El componente principal de la pantalla foi fabricáu al traviés de tecnoloxíes d’impresión 3D de sinterizáu plástico colos equipos industriales disponibles nes sedes de los miembros del consorciu. Depués el dispositivu dotóse d’un plásticu protector y d’una goma de fixación trasera. Nel componente impresu inclúyese’l mensaxe Arguyosos de los nuestros sanitarios, col que quier tresmitise’l sofitu de la sociedá al personal sanitario.

Estes pantalles, sicasí, esperen un trámite alministrativu pa poder usase. La comercialización d’esta clas d’equipamientu de protección individual rique’l llogru d’un marcáu CE según el Reglamentu (UE) 2016/425. La Conseyería de Ciencia consultó esti puntu col Institutu de Salú Carlos III, qu’informó de que podríen usase baxo un usu esperimental si s’algama un certificáu d’eficacia d’una axencia homologada o d’un organismu d’evaluación de tecnoloxíes sanitaries. Anguaño, trabáyase n’acelerar esta comprobación.

L’alianza, constituyida por ArcelorMittal, ThyssenKrupp y el centru tecnolóxicu Idonial, enfótase en qu’esta iniciativa ayude a remediar les necesidaes d’hospitales y centros sanitarios tanto d’Asturies como del restu del país.

Depués del anunciu d’esti proyectu pol Gobiernu d’Asturies, foron delles les empreses que quixeron xuntase colos sos equipos profesionales de fabricación aditiva. Amás de NormaGrup, tamién dexó pantalles en 3D la empresa de fabricación aditiva Aciturri AM.

Información sobre el documento

© Copyright 2006. Gobiernu del Principau d'Asturies