Gobiernu del Principau d'Asturies

Asturies, muncho más cerca

Tas en

Asturias.es El Principáu promociona les rutes xacobees nel congresu Fair Way ...
 

Aniciu

El Principáu promociona les rutes xacobees nel congresu Fair Way ente turoperadores europeos y hispanoamericanos

13/11/2017

   - Técnicos de Turismu van tener 15 alcuentros con empreses del sector qu’ufierten el Camín de Santiago nos sos catálogos

El Gobiernu d’Asturies promociona estos díes el Camín de Santiago de la que pasa pela comunidá na segunda edición del foru y congresu profesional Fair Way. Nel certame, qu’axunta a profesionales del sector turísticu, axencies de colectivos relixosos, asociaciones xacobees nacionales y internacionales y públicu en xeneral, los técnicos del Principáu van reunise con una quincena de turoperadores europeos y hispanoamericanos que programen visites a les rutes xacobees o tán interesaos en facelo.

El foru celébrase en Santiago de Compostela, cola presencia d’empreses del sector procedentes de Reinu Uníu, Irlanda, Italia, Alemaña, Brasil, Colombia y Arxentina, que podríen ampliar la presencia d’Asturies nos sos catálogos.

L’asistencia a esta feria enmárcase nel plan d’actuaciones que’l Principáu impulsó pal caltenimientu, difusión y promoción de les rutes xacobees. Ente eses acciones, destaquen la publicación del Llibru Blancu del Camín de Santiago –qu’incluye 80 midíes, 23 d’elles en marcha- y el diseñu d’una estratexa específica de promoción. La inversión total prevista pa impulsar anguaño les víes xacobees algama los 834.425 euros, a los que se sumen otros 75.000 recoyíos na llei de creitu estraordinariu.

Asturies recibe cada añu ente 21.000 y 30.000 pelegrinos, que xeneren de 9 a 12 pernoctaciones por persona. El valor principal del Camín de Santiago como productu turísticu ta precisamente d’esa estancia media tan alta, amás de na so capacidá p’atrayer visitantes estranxeros, el so calter desestacionalizador y la vertebración territorial que favorez, porque les rutes percuerren 36 conceyos, munchos d’ellos apartaos de los circuitos principales.

Ente les acciones previstes nel plan de promoción pal añu que vien destaquen campañes de publicidá, contactos con prescriptores como congregaciones relixoses o medios especializaos, l’asistencia a feries y congresos, y llabores de formación empobinaes a agospedamientos, informadores y guíes, amás de la participación en redes, marques y programes nacionales y europeos.

El Gobiernu d’Asturies impulsó nel 2015 la declaración de los Caminos de Santiago como Patrimoniu Mundial de la UNESCO y apocayá formalizó la incorporación de les rutes xacobees al programa Itinerarios culturales del Conseyu d’Europa, una de les más prestixoses organizaciones internacionales dedicaes a promocionar la diversidá cultural y el turismu sostenible.

 

 

Información sobre el documento

© Copyright 2006. Gobiernu del Principau d'Asturies