Gobiernu del Principau d'Asturies

Asturies, muncho más cerca

Tas en

Asturias.es Desenvolvimientu Rural destinó cuasi 1,5 millones a la promoción ...
 

Aniciu

Desenvolvimientu Rural destinó cuasi 1,5 millones a la promoción y el control de calidá de la denominación d’orixe Sidra d’Asturies na última década

La conseyera María Jesús Álvarez destaca que la producción de los llagares inscritos na marca medró un 247 % y el so valor pasó de 842. 000 euros a cuasi dos millones nesti periodu

19/05/2017

El Gobiernu del Principáu destinó na última década cuasi 1,5 millones n’ayudes al conseyu regulador de la Denominación d’Orixe Protexida (DOP) Sidra d’Asturies pa promoción y controles de calidá. Amás, la producción de los 22 llagares inscritos na marca medró un 247 % nesti periodu y el so valor económicu pasó de 842.000 euros a cuasi dos millones.

La conseyera de Desenvolvimientu Rural y Recursos Naturales, María Jesús Álvarez, dio güei estos datos de la que comparecía na Xunta Xeneral del Principáu. “Nenguna otra producción protexida de la nuestra comunidá autónoma tien un nivel d’apoyu asemeyáu, que s’avera al 10 % del valor total de la producción”, precisó.

Álvarez señaló que’l so departamentu va siguir trabayando pa que la llinia de producción ascendente se caltenga, “con cuenta de que tola sidra de mazana asturiano tea incorporao a la DOP”.

Tamién aclarió que’l conceptu de sidra asturiano, al que se refirió nel Parllamentu’l grupu de Foru Asturies, nun forma parte del vocabulariu del sector agroalimentariu del Principáu. Nesti sentíu, sorrayó que na comunidá hai un ampliu númberu de llagareros que producen la bebida en toles sos variantes: natural, dulce, de mesa, brut o de xelu, y una denominación d’orixe qu’integra a los qu’acreíten el cumplimientu de determinaes condiciones.

“La espresión sidra asturiano non solo nun tien soporte llegal, sinón que ye un términu confusu qu’estropia l’espardimientu y proyección de la denominación Sidra d’Asturies, lo único pa lo que se pue acreitar una garantía y un orixe”, añedió Álvarez.

La conseyera recordó que la llexislación comunitaria quita al Principáu de promocionar marques comerciales específiques, lo qu’implicaría una intromisión clara na competencia ente los operadores. Sicasí, señaló que, cola mira de sofitar la industria agroalimentaria en xeneral, anguaño convocáronse ayudes por un valor de nueve millones. “Tamién podemos dar subvenciones, y eso facemos, a les marques de garantía y calidá de titularidá autonómica, tanto directamente como a les sos entidaes xestores”, sorrayó.

 

Campaña promocional

Álvarez detalló que’l so departamentu impulsó nel 2016 un programa de promoción por un total de 122.242 euros, qu’usaba como referencia la marca de garantía Alimentos del Paraísu Natural y na que la DOP Sidra d’Asturies tenía un papel protagonista, polo que’l so resultáu foi pervaloráu polos productores. Anguaño, la partida pa la campaña va medrar hasta los 170.000 euros.

Otra manera, la conseyería destinó l’añu pasáu 332.072 euros a la promoción de productos de calidá estremada (denominaciones d’orixe y indicaciones xeográfiques protexíes), al traviés de los conseyos reguladores. D’esta cifra, 67.900 euros foron al conseyu regulador de la DOP Sidra d’Asturies, lo que fixo posible un gastu de promoción de 102.120 euros. Asina, Sidra d’Asturies recibe alredor del 21,08 % d’estes ayudes, cuando la bébora representa aproximao’l 5 % del valor total de la comercialización de productos de calidá.

Anguaño córchense y etiquétense 1.100.000 botelles al añu como Sidra d’Asturies, lo que representa un 2,44 % del total embotelláu. “Ye, obviamente, la única sidra que tien que ser oxetu d’esta denominación y, amás d’eso, lo único que pue recibir sofitu institucional al tar integrao nuna marca de calidá estremada”.

La conseyera señaló que, con calter xeneral, el Gobiernu del Principáu “ta satisfechu de la evolución de la marca de garantía Alimentos del Paraísu Natural, qu’esperimentó una medría curiosa nel últimu añu y incorpora yá cincuenta operadores agroalimentarios”. Na so opinión, tamién foron positives les campañes publicitaries que se desenvuelven con esa marca “y que tuvieron una acoyida favorable ente los productores y una valoración favorable na última edición de Gourmet, en Madrid”, añedió.

Información sobre el documento

© Copyright 2006. Gobiernu del Principau d'Asturies