Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El programa Tiempu propiu pa muyeres de más de 50 años suma ...
 

Actualidá

El programa Tiempu propiu pa muyeres de más de 50 años suma conteníos nuevos sobre igualdá

La Dirección Xeneral del Institutu Asturianu de la Muyer y Polítiques de Mocedá incorpora un taller sobre violencia de xéneru y xornaes de divulgación del protocolu autonómicu. El Gobiernu incrementa anguaño un 83 % el presupuestu pa esta iniciativa, hasta algamar los 55. 000 euros. Nesta llexislatura entamáronse 250 actividaes con 2. 700 participantes en 37 conceyos de menos de 50. 000 habitantes

De izquierda a derecha: La directora general del Instituto Asturiano de la Mujer y Políticas de Juventud, Almudena Cueto; el consejero de Presidencia y Participación Ciudadana, Guillermo Martínez; y los responsables del programa Tiempo Propio de la fundación Metal Asturias, Alberto González y Concepción Hernández

11/02/2019

El Gobiernu d’Asturies, al traviés del Institutu de la Muyer y Polítiques de Mocedá, va ampliar anguaño los conteníos del programa Tiempu propiu pa muyeres mayores de 50 años con un taller sobre violencia de xéneru y promoción de la igualdá y xornaes informatives d’espardimientu del protocolu autonómicu contra la violencia sexual. La iniciativa, que se desenvuelve en 37 conceyos de menos de 50.000 habitantes, va cuntar anguaño con 55.000 euros, un 83 % más que l’anterior.

El programa articúlase al traviés d’un conveniu de collaboración ente’l Principáu y la Fundación Metal y va incorporar el taller Sensibilización n’igualdá d’oportunidaes, que se va impartir en delles sesiones de dos hores y media en tolos conceyos participantes. L’oxetivu ye concenciar a les muyeres sobre la necesidá d’avanzar n’igualdá al traviés de la divulgación sobre la discriminación nel ámbitu social y familiar, la identificación de situaciones de desigualdá como elementu subxacente na violencia de xéneru y la difusión de los recursos públicos contra les distintes violencies machistes.

Amás, tamién ta prevista la realización de xornaes informatives y de divulgación sobre’l protocolu contra la violencia sexual. Aparte, tolos talleres van incluyir conteníos sobre igualdá y violencia de xéneru.

Tiempu propiu yá imparte dende va años actividaes sobre’l papel de la muyer en dellos ámbitos sociales y culturales, ente ellos Muyeres viaxeres. Asturianes pel mundu, qu’ufierta información sobre asturianes entamadores a lo llargo de la historia, y Asturianes n’América, que reivindica’l papel femenín na emigración, poniendo en valor figures de la relevancia de Concha Eres, la marquesa d’Argüelles, Eva Canel o María Teresa Prieto.



Un programa en marcha dende’l 2002

El proyectu surdió nel 2002 como esperiencia pilotu en trés conceyos y ufierta un espaciu d’alcuentru al traviés d’actividaes d’intercambéu y de talleres en materia de salú, avieyamientu activu, cultura y tecnoloxíes nueves pa promover la participación social de la muyer.

Nesti sentíu, busca la meyora de la calidá de vida y el bienestar integral de les muyeres cola promoción de vezos saludables, y l’actualización y adquisición de conocimientos cola mira última d’impulsar la so presencia y protagonismu na sociedá.

Nos postreros trés años, el Gobiernu d’Asturies destinó 90.000 euros al desenvolvimientu d’esti programa, qu’impartió 205 talleres y 2.500 actividaes con 2.700 participantes en 37 conceyos. Dende la so puesta en marcha, 11.000 muyeres foron a les actividaes de Tiempu propiu.

 

Información sobre el documento

© Copyright 2006. Gobierno del Principado de Asturias