Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos Cultura y la Comarca de la Sidra firmen un protocolu de ...
 

Información de los Conceyos

Cultura y la Comarca de la Sidra firmen un protocolu de collaboración pal fomentu de los rodaxes y el turismu cinematográficu

Berta Piñán robla l’alcuerdu en Fitur colos alcaldes de Bimenes, Cabranes, Colunga, Nava, Sariegu y Villaviciosa. Asturies Paraísu Natural Film Commission trabaya pa llegar a alcuerdos con otros conceyos y entidaes públiques y privaes

El alcalde de Sariego, Saúl Bastián; el de Nava, Juan Cañal; el regidor de Cabranes, Gerardo Fabián; la consejera de Cultura, Política Llingüística y Turismo, Berta Piñán; la alcaldesa de Colunga Sandra Cuesta, y los regidores de Villaviciosa y Bimenes, Alejandro Vega y Aitor García, respectivamente

22/01/2020

Asturies Paraísu Natural Film Commission y la mancomunidá de la Comarca de la Sidra soscribieron güei un alcuerdu de collaboración col que quier favorecese la consecución de rodaxes de proyectos de cine, televisión, publicidá y otros proyectos audiovisuales qu’ayuden a asitiar Asturies y a los conceyos collaboradores como destín film friendly, impulsando’l desenvolvimientu del sector audiovisual asturianu y favoreciendo la medría del turismu cinematográficu na rexón.

La conseyera de Cultura, Política Llinguística y Turismu del Principáu, Berta Piñán, y los alcaldes de los conceyos de la Mancomunidá de la Comarca de la Sidra, encabezaos pol so presidente y alcalde de Bimenes, Aitor García, firmaron esti alcuerdu nun actu celebráu nel estand d’Asturies na Feria Internacional de Turismu (Fitur).

Cola firma del protocolu llamáu Rueda n’Asturies, el film commission activa una canal de comunicación fluyíu cola Comarca de la Sidra que va favorecer el desenvolvimientu de rodaxes y la promoción del territoriu como plató. En virtú d’esti alcuerdu, los conceyos que conformen la mancomunidá (Bimenes, Cabranes, Colunga, Nava, Sariegu y Villaviciosa) van facilitar l’accesu a localizaciones públiques y privaes y van facer entainar, na midida de lo posible, la concesión de permisos de rodaxe. Amás, depués d’un estudiu particular de cada proyectu, estos conceyos comprométense a valorar l’aplicación de “tases amigables” o una “tasa cero” d’ocupación de vía pública.

L’espardimientu de la información ente los profesionales del sector, el sofitu a l’acoyida de rodaxes y al accesu a les localizaciones o la divulgación de les noticies xeneraes son otres árees nes que dambes entidaes comprometen la collaboración. Asturies Paraísu Natural Film Commission trabaya yá pa secundar alcuerdos Rueda n’Asturies con otros conceyos, amás de con otres entidaes públiques y privaes interesaes, que redunden positivamente na imaxe, el turismu y la economía del Principáu.



Iniciatives pioneres

Asturies Paraísu Natural Film Commission nació nel 2016 cola misión de facilitar a los productores y profesionales del sector audiovisual rexonal, nacional y internacional información y sofitu pa la realización de rodaxes nel Principáu. De la mesma manera, promueve Asturies como plató natural y destín de turismu cinematográficu en dellos foros.

Trátase del únicu proyectu d’esta naturaleza na rexón, que forma parte amás de la rede nacional de Spain Filme Commission, polo que l’establecimientu d’estos protocolos d’actuación nuevos va suponer la implantación de los calces d’información y metodoloxía de trabayu óptimos que van redundar na imaxe de cada conceyu, y por estensión d’Asturies, como destín cinematográficu.

La film commission asturiana yá cuntó cola collaboración de la Mancomunidá de la Sidra nel desenvolvimientu del primer viaxe de familiarización pa directores y técnicos de localización de cine, televisión y publicidá, una iniciativa pionera nel Principáu que se fixo nel branu pasáu y na que participó tamién l’Asociación Clúster Industria Creativa, Cultural y Audiovisual d’Asturies (Acicca).

L’impulsu y captación de proyectos audiovisuales ye una de les llinies estratéxiques del desenvolvimientu turísticu de la Mancomunidá Comarca de la Sidra, que lleva participando dende va años en delles iniciatives de calter innovador que-yos dexaron asitiase como ún de los espacios de referencia turística d’Asturies. Les series Doctor Mateo, La Zona o El Paisano, películes como La dama de Porto Pim de José Antonio Salgot, o anuncios como los grabaos pa Lloteríes del Estáu o Ferrero Rocher, dexaron la creación de distintos productos turísticos que fixeron d’esta contorna ún de los destinos de referencia n’Asturies, amás de suponer un incentivu pal desenvolvimientu de los sectores audiovisual y de servicios y favorecer la desestacionalización turística na zona.

Información sobre el documento

© Copyright 2006. Gobiernu del Principau d'Asturies