Gobiernu del Principau d'Asturies

Asturies, muncho más cerca

Tas en

Asturias.es Asturies y Cantabria piden al Executivu central que suprima la ...
 

Aniciu

Asturies y Cantabria piden al Executivu central que suprima la llende p’ampliar viñes nes árees pequeñes de dambes comunidaes

Los conseyeros María Jesús Álvarez y Jesús Miguel Oria firmaron un alcuerdu qu'escuerre garantizar el futuru de les denominaciones d'orixe y les indicaciones xeográfiques protexíes nes dos autonomíes. La titular de Desenvolvimientu Rural participó en Barcelona na inauguración de la feria Alimentaria, na que'l Principáu cunta pela primer vez con estand propiu

El consejero de Medio Rural, Pesca y Alimentación de Cantabria, Jesús Miguel Oria, y la consejera de Desarrollo Rural y Recursos Naturales, María Jesús Álvarez

16/04/2018

La conseyera de Desenvolvimientu Rural y Recursos Naturales, María Jesús Álvarez, y el conseyeru de Mediu Rural, Pesca y Alimentación de Cantabria, Jesús Miguel Oria, firmaron güei un alcuerdu pa proponer a comuña al Gobiernu central la supresión de la llende actual de plantíos nuevos pa les árees pequeñes de viñéu de dambes comunidaes.

“El marcu normativu vixente llimita la crecedera de la superficie de viñéu, lo qu'incide de forma bien importante en comunidaes como Asturies y Cantabria, nes que la superficie total de viñes ye bien pequeña, como nel casu de la denominación d'orixe protexida Vinu de Cangas, y la capacidá de crecedera ye bien importante pa garantizar el futuru de les sos producciones”, sorrayó Álvarez.

Por aciu l'alcuerdu, soscritu na feria Alimentaria de Barcelona, les dos autonomíes van pidir al Ministeriu d'Agricultura que, p’árees d'indicación xeográfica protexía (IXP) o denominación d'orixe protexida (DOP) con superficies de viñéu inferiores a 200 hectárees, estableza con calter xeneral una cifra máxima almitible de plantíu nuevu autorizable perbaxo de la cual resulte d’asignación automática y nun s'estableza, por tanto, criteriu de prioridá. “Esta cifra podría asitiase en 25 hectárees anuales por DOP o IXP. D'esta miente, daríase respuesta a la práctica totalidá de les demandes de les árees pequeñes”, indicó la conseyera.

Asina, Asturies y Cantabria reclamen autorización ministerial pa toles solicitúes qu'axunten unes condiciones específiques. Dambos gobiernos planteguen autorizaciones automátiques en solicitúes bien pequeñes, de menos de 1,5 hectárees. Tamién defenden l'autorización directa pa superficies que nun lleguen a les 5 hectárees n'árees con dificultaes reconocíes, como zones despoblaes y desfavoreciíes. Un tercer planteamientu pal que se solicita aprobación automática refierse a los pidimientos de menos de 5 hectárees n'árees con condiciones físiques singulares, como les de viticultura heroica con zones de monte de pendientes superiores al 20 % o con zones intermedies con pendientes superiores al 15 %, siempre que supongan una solicitú continua de pequeña dimensión.

 

Autorización previa

La normativa reguladora de la Unión Europea (UE) esixe la obligación d'autorización previa pa los plantíos nuevos, nel marcu de les regles d'aplicación establecíes por cada país. N'España, con una superficie vitícola próxima al millón d'hectárees, esta cuestión ye determinante dende'l puntu de vista de l'actividá económica. Sicasí, Asturies y Cantabria consideren qu'esta realidá nun puede ocultar la esistencia de dalgunes DOP y IXP con bien poca repercusión económica nel conxuntu y, sicasí, de gran valor territorial. “Son árees nes que l'afitamientu y aumentu d'eses superficies pequeñes de viñéu, siempre en términos bien prudentes, nun supón desequilibriu nengún, pero tien incidencia grande en zones despoblaes, onde la viticultura, cuasi siempre en condiciones de viticultura heroica, ye un argumentu de vertebración territorial”, aseveró’l titular de Desenvolvimientu Rural.

Álvarez sorrayó que, na práctica, cola normativa actual, les superficies otorgaes a estes árees son tan llimitaes que l'autorización actúa con efectu disuasoriu, de manera que parte sustancial de lo solicitao nun s'autoriza, y otra parte igualmente importante nun se llega a plantar, porque resulta técnica y económicamente invidable. Al so xuiciu, énte esta situación ye menester plantegar “un escenariu d’elexibilidá alternativu pa les bien pequeñes DOP y IXP en condiciones d'escepcionalidá, que dexe autorizaciones efectivamente útiles”.

La conseyera participó güei na inauguración de la feria Alimentaria, na que'l Principáu cunta pela primer vez con un estand propiu que promociona la marca Alimentos del Paraíso Natural y los productos amparaos por DOP y IXP. En total, participen nel certame 15 empreses asturianes, de les que 6 muestren los sos productos nel estand rexonal.

Álvarez destacó qu’Alimentaria ye la feria más importante del sector n'España, na qu'anguaño participen 4.000 empreses de 70 países. Tamién indicó que’l so departamentu dedica anguaño 700.000 euros a promocionar los productos del Principáu, de los que 300.000 son xestionaos directamente pola conseyería.

 Icono gráfico alusivo al tipo de archivo Audiu (Audiu: 301 Kb) (n'español)

Información sobre el documento

© Copyright 2006. Gobiernu del Principau d'Asturies