Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Gobiernu d’Asturies abre güei la residencia de mayores ...
 

Actualidá

El Gobiernu d’Asturies abre güei la residencia de mayores Naranco d’Uviéu, con capacidá pa 166 usuarios

Trés persones estrenen la instalación ampliada, que na so reforma invirtiéronse 6,3 millones. Un total de 68 empleaos públicos d’atención directa van trabayar nel centru

27/03/2019

El Gobiernu d’Asturies punxo güei en serviciu la residencia de mayores Naranco d’Uviéu, con capacidá para 166 persones. Trés usuarios estrenaron la instalación, anovada dafechu y ampliada con una inversión de 6,3 millones: 5.542.928 euros n’obres y otros 800.900 n’equipamientu.

Nel centru, al que los residentes nuevos van incorporase de manera progresiva, van trabayar 68 profesionales públicos d’atención directa: 57 auxiliares d’enfermería, 7 enfermeros, un responsable de dirección, un técnicu d’intervención, un fisioterapeuta y un auxiliar alministrativu.

Con estes places nueves, la ufierta residencial pública autonómica n’Uviéu va tar en 1.102. L’organismu autónomu Establecimientos Residenciales p’Ancianos d’Asturies (ERA) xestiona los centros polivalentes de recursos (CPR) de Santa Teresa (289 places), El Cristo (190) La Tenderina (116) y Naranco (166), amás de la residencia Trisquel (72). Tamién hai 269 places concertaes con empreses privaes. A estos recursos pa persones dependientes, súmense los apartamentos Cuadonga, con capacidá pa 78 usuarios, destinaos a mayores con autonomía plena.

Les obres llevaes a cabu, enriba d’una parcela de 76.137 metros cuadraos y con una superficie útil de 8.204, incluyeron la rehabilitación integral de la residencia vieya pa convertila nuna instalación moderna, adaptada a les necesidaes actuales y a la llexislación vixente. Pa eso, ameyoróse la eficiencia enerxética y amplióse’l númberu de places de 152 a 166.

Amás, cola mira de favorecer l’atención a usuarios y residentes, habilitáronse más sales de sofitu y comedores y aumentóse’l númberu de baños xeriátricos y de cuartos individuales.

D’equí p’arriba, l’equipamientu va cuntar con 47 cuartos dobles y 72 individuales, frente a los 51 y 40, respectivamente, que tenía primero de la reforma.

 

Información sobre el documento

© Copyright 2006. Gobierno del Principado de Asturias