Gobiernu del Principau d'Asturies

Asturies, muncho más cerca

Tas en

Asturias.es Temes Consumu Salú convoca ayudes por valor de 910.000 euros pa planes ...
 

Consumu

Salú convoca ayudes por valor de 910.000 euros pa planes municipales de drogues y acciones de protección de los consumidores

Les entidaes locales tienen un mes de plazu pa presentar les sos solicitúes na sede electrónica del Principáu

20/07/2020

La Conseyería de Salú publica güei nel Boletín Oficial del Principáu (Bopa) la convocatoria d'ayudes a entidaes locales pa la execución de programes municipales contra les drogues y el desenvolvimientu d'acciones de protección de los derechos de consumidores y usuarios. El Principáu dedica 910.000 euros a financiar estes iniciatives.

Los fondos estrémense en dos llinies d'actuación: 800.000 euros pa planes de prevención y promoción de vezos saludables y 110.000 pa promover y espublizar los derechos de los consumidores.

L'añu pasáu, la Conseyería de Salú movilizó 770.860 euros n'ayudes a programes contra la drogadicción. En total, beneficiáronse 39 conceyos y cuatro mancomunidaes, que presentaron iniciatives preventives de calter comunitariu qu'implicaben al texíu social.

Estes actividaes tamién contribúin a xenerar empleos directos, principalmente n'organizaciones non gubernamentales, asociaciones ensin ánimu d'arriquecimientu y empreses del tercer sector que trabayen nel campu de les adicciones, amás de puestos de trabayu nos conceyos qu'impulsen los planes.

La segunda de les llinies de subvención impulsa acciones municipales pa que la ciudadanía conoza los sos derechos en relación col consumu y exercelos de manera crítica y responsable.

Les entidaes locales tienen un mes de plazu, dende mañana, pa presentar les sos solicitúes al traviés de la sede electrónica del Principáu (https://sede.asturias.es ).

Información sobre el documento

© Copyright 2006. Gobiernu del Principau d'Asturies