Gobiernu del Principau d'Asturies

Asturies, muncho más cerca

Tas en

Asturias.es Cadasa estudia ampliar los sos servicios y xestionar la ...
 

Aniciu

Cadasa estudia ampliar los sos servicios y xestionar la distribución d’agua potable dientro de les poblaciones

- El consorciu entama una xornada pa presentar a los conceyos les fórmules pal abastecimientu en baxa usaes en Bilbao, Badayoz y Xixón

12/06/2018

El Consorciu pal Suministru d’Agua y Saniamientu d’Asturies (Cadasa) estudia ampliar los servicios que da na actualidá pa facese cargu tamién, a instancies de dellos conceyos, de la distribución del agua potable dientro de les poblaciones, lo que se conoz como xestión en baxa.

Énte l’interés amosáu por esti serviciu polos conceyos de Siero, Navia, Noreña, Gozón y Samartín del Rei Aurelio, la última xunta de gobiernu de Cadasa, celebrada’l 8 de mayu, aprobó la creación d’una comisión técnica que va analizar la viabilidá técnica y económica de l’atribución municipal de la distribución d’agua en baxa. Na comisión intégrense los cinco conceyos mentaos, anque ta abierta a la incorporación d’otros conceyos.

Esti foi ún de los asuntos analizaos güei na xornada técnica celebrada na sede de la Federación Asturiana de Conceyos (FACC), onde los representantes municipales recibieron información sobre les fórmules usaes en ciudaes como Bilbao, Badayoz y Xixón pal suministru en baxa. El conseyeru d’Infraestructures, Ordenación del Territoriu y Mediu Ambiente y presidente del consorciu, Fernando Lastra, destacó que’l valor del agua ta na xestión y animó a los asistentes a atopar fórmules que dexen avanzar na eficiencia y la sostenibilidá.

La sesión de trabayu cuntó cola presencia de representantes políticos y técnicos de dellos conceyos. Los asistentes pudieron conocer los casos del Consorciu d’Agua de Bilbao al traviés de la sociedá UdalSareak S.A, el Consorciu de Servicios Ambientales de Badayoz, Promedio, entidá supramunicipal formada pola diputación provincial y una trentena de conceyos, y la Empresa Municipal d’Agua (EMA) de Xixón. Los sos respectivos xerentes, Koldo Urkullu, Álvaro Jiménez y Vidal Gago, respectivamente, esplicaron les ventayes y los inconvenientes de cada modelu. Pela so parte, el xerente de Cadasa, Julio Antonio Pérez, moderó una charla coloquiu sobre esti tema, onde se trataron, ente otros asuntos, los retos de la prestación del serviciu de suministru y abastecimientu d’agua nel mediu plazu, dende la óptica de les alministraciones locales.

El Consorciu d’Agua d’Asturies, encargáu dende 1967 del suministru y saniamientu del recursu n’alta —la xestión del agua hasta los depósitos municipales—, estudia anguaño les opciones llegales, financieres y organizatives de que dispón la entidá pa incluyir dientro de les sos funciones la xestión a nivel micro; esto ye, hasta’l cañu de casa.

Nel futuru, Cadasa podría ufiertar a los conceyos consorciaos la xestión del ciclu integral: potabilización, distribución, suministru y depuración, y avanzar escontra un modelu supramunicipal onde l’usu compartíu de recursos y les economíes d’escala dexen a les entidaes collaboradores aforrar y dar el serviciu con mayores garantíes.

 

 

Información sobre el documento

© Copyright 2006. Gobiernu del Principau d'Asturies