Gobierno del Principado de Asturias

Asturias, mucho más cerca

Estás en

Aniciu Temes Economía y finances El Principáu subvencionó con 621.000 euros la reforma de cinco ...
 

Economía y finances

El Principáu subvencionó con 621.000 euros la reforma de cinco cases consistoriales nel 2015

El viceconseyeru d'Alministraciones Públiques, Álvaro Álvarez, visita les obres del Conceyu de Castropol. Les meyores realizáronse tamién en Villayón, A Veiga, Riosa y Morcín

23/04/2016

El Gobiernu del Principáu subvencionó l'añu pasáu con 621.000 euros la meyora de cinco cases consistoriales en Villayón, A Veiga, Riosa, Morcín y Castropol. El viceconseyeru d'Alministraciones Públiques, Álvaro Álvarez, facilitó güei los datos mientres la so visita a les obres que se realicen nel Conceyu de Castropol.

Álvarez destacó la implicación del Principáu nel sofitu a les entidaes locales, sobre manera naquellos casos onde la so capacidá financiera ye escasa. “Ye clave que l'alministración autonómica sofite a los conceyos pa que puedan encarar actuaciones que de manera individual seríen difíciles d'acometer”, aseguró'l viceconseyeru, que tuvo acompañáu pol alcalde del conceyu, José Ángel García y el director xeneral d'Alministración Local, Ricardo Suárez.

El Principáu y el Conceyu de Castropol firmaron un conveniu nel 2014 pa la rehabilitación de la casa consistorial. La reforma supón una inversión de 1,2 millones, de los que'l Principáu aporta 900.000 euros en tres anualidaes: 100.000 euros nel 2014, 450.000 nel 2015 y 350.000 anguaño. “Trátase d'una obra importante, que va dexar ameyorar l'accesibilidá de los vecinos al so conceyu, les condiciones de trabayu de los emplegaos municipales y la eficiencia enerxética del edificiu”, esplicó'l viceconseyeru.

Tocantes a les obres, la meyora de la estructura del edificiu yá ta llista, asina como les redes de saniamientu, fontanería y ventilación. Anguaño trabáyase na instalación eléctrica y na distribución interior y espérase que d’equí a poco s’empecipie l'allugamientu de la estructura del ascensor, del sistema de calefacción y empiece’l pintáu de les fachaes. Prevése que les obres rematen esti añu.

Información sobre el documento

© Copyright 2006. Gobierno del Principado de Asturias